Am in Love

With this Game :)
Sent from my BlackBerry® smartphone from Wataniya Telecom

بسبوسة

هلووو

هاذي وصفة بسبوسه خذيتها من قروب اختي حبيبتي بنت الديرة

وصارلي فتره اسويها لانها حدها لذيذه واهم شي سهله

:)

بالخلاط :

3/1 كوب زيت

2 بيض

1 قيمر kdd

شوية فانيليا

في ماعون ثاني نخلط :

1 كوب سميد عادي

1 كوب حليب نيدو بودره ( انا استعملت حليب التموين)

1 كوب سكر

1 ملعقه صغيره بيكينج باودر

- نحط المقادير اللي بالخلاط على النواشف اللي بالماعون ونخلطهم يدوي حتى يتجانس الخليط

- وعقب بصحن بايركس او صحن الكيك المستطيل وبالفرن

جربــوها صدقوني لذيذه .. وبالعافيـــــــــه

:)

!

صج وناسه عطله
بس ليش المولد النبوي 3 أيام ؟
أنا قاريتها غلط ؟
Sent from my BlackBerry® smartphone from Wataniya Telecom

تنتوفات

هلوو شلونكم

رحت الممشى اخيرا .. صج الجو مو ذاك الزود بس تشجعت شويه

(ميمة السبيت ترا سبقتج) :P

شحنت الايبود .. وحطيت اغاني يدد

ورحت

مشيت تقريبا ساعه

بس وانا امشي والناس وزحمه

هفت علي ريحة

كنت طول الوقت متوقعه اشم ريحة شوي .. سوالف كباب.. لحم .. ذرة

لان الممشى على البحر

واشوف اللي يشوون ويهفون بمهفاتهم على الفحم

بس اللي فاجأني اني شميت بخووور

قلت شفيه خشمي من الرطوبه ضاربه فيوزاته؟

اخترعت لول

والا الحمدالله اثاري هندي مجبل علي وجنطته ومبخر بيده ودخنة بخور يبيع

اول مره اشوف بياع يبيع في هالاماكن

سؤال : احد شاف هالمنظر قبلي ؟

==================

شي حلو اوقات العمل في صفاة الغانم صارت 24 ساعه

حق اللي يحب يطلع متأخر ويتحاشى الزحمه المعتاده

او حق اللي متعود يسهر

خلاص بدال ما يروح مركز سلطان والا جمعية

صار يقدر يتسوق في صفاة الغانم الحين

:>

===================

مره وحده معانا بالدوام يابت لنا حلاو من لندن

كوليكشن وايد انواع

طمعنا قمنا نذوق من كل نوع

الا وحده ذاقت كل شي الا نوع واحد وقفت عنده وقامت تقرا المحتويات

لما قرته والا فيه جيلاتين خنازير شي جذي

قالت وييييه اشوا اني ما كليته جان خنزرت !

عاد حاشنا الوسواس وقمنا نقرا محتويات كل الحلاو اللي كلينا منه

والا في نوع فيه Wine

عاد هذا شكثر كلينا منه

جان اقولها عيل احنا خنزرنا وسكرنا بعد لووول

===================

قبل ما انام بسأل

شنو سالفة الطماط؟

ليش الاسعار صارت جذي مبالغ فيها؟

اسبانيا تلعب لعب بمهرجان الطماط عندهم واحنا صار ب 5 دنانير وشكله الله يزيد النعمه

يبيله اروح هناك القط لي جم طماطه

لزووووم نبلغ الشيخ بالسالفه :P

تصبحـون علـــى خيـــــــــر

??Be ware of the ....

.... new toaster lol :p
Sent from my BlackBerry® smartphone from Wataniya Telecom

تحديث :
=====

تم تركيب كاميرات رادار جديده بالكويت الاولى من نوعها بالشرق الاوسط
طريقتها باختصار تسجل سرعتك حتى لو كنت مخفف وقت المرور عليها
يعني راحت علينا الحركات اللي كنا نسويها لما نحفظ ونثبت مكان كاميرا بالشارع :P
بس صج .. مو جنها تووستر نحمش فيه توست الريوق ؟

Chocolate fondue

هلووو

مادري اذا شايفين هال chocolate fondue

وبداخل العلبة تلقون حتى الشمعه موجوده

وماقدر اقول رايي لاني ما جربته ليلحين

بس شكله مجكنم ولابق

تلقونه في ACE

مع اشكال ثانيه احلى مع الصحون

:)

شكـــرا ...

عدت اليكم لأقول :

شكــــــرا لكم أحبتي

لكل من ساندنــي

بـ رد في مدونتي

ايميل

مسج

لكل من وقف معي وآزرنــي

باتصال هاتفي

او حضور

ودعاء في ظهر الغيب

شكرا لطيبكم الذي غمرني

ولا أراكم الله مكروه بعزيز

الله لا يحرمني من وجودكم

غربـــة الروح

تطري علي مواقف .. فلاشات ولمحات مو مرتبه زمنيا

وتحضرني كلمات الفيصل لما يقول " في غير الزمان في نفس المكان مرتني الذكرى وانا واقف في نفس المكان .. "

يطري علي لما امي بمرضها وتعبها وملازمة للسرير مافيها حيل

كانوا لما يقعدونها ويحطون ورا ظهرها مخده

كنت المها فجأة بدون مقدمات

تقول لي " شفيج خرعتيني ! "

اقول لها " قاعدة اعطيج قوة .. يمه ما تبين قوة ؟ "

ترد علي " امبله ابي "

والمها حيـــــــــــــــل

وبداخلي شعور اني صج اعطيها قوة خفية .. تصبرها على اللي اهيا فيه

تطري على ضحكتها .. من مرضت حبيبتي وزاد تعبها ما شفتها تضحك

احب اشوف رقم موبايلها بتلفوني وانا بالدوام تصبح علي وتطمن اني وصلت

في بالي حركة ايدها .. مشيتها .. صراخها لما تزفنا ونطفرها .. تحلطمي عليها لما اضيعها في مكان زحمه ..

صورتها في بالي لما القاها الصبح مع ريوقها وابرتها مالت السكر تدور غطاها البرتقالي طايح منها ما تشوفه تحت الصحن ..

سوالفي .. فرحي .. حزني .. سفراتي .. طلعاتي كله معاها

دايما اقول لها انتي رفيقة الدرب

ملازمتها ولاصقه فيها حتى وانا صغيره مو هادتهم بروحهم انام معاهم بالدار

وتطري علي سوالف وسوالف وانا ويــــــن ؟؟ واقفه بينهم في عزاج !

واقفة بينهم وتذبحني غربة الروح .. غريبة بروحي معاهم ..

تذبحني فكرة اني برد البيت و ما القاج

في اذوني يهمسون " عظم الله اجرج " ومره ارد ومرات اسكت ما ارد مو مصدقه

شلون ابصبر على وحشة الدنيا من غيرج

شلون يمر يومي من غير حسج

اطلع واروح وانا ادري اني برد اسولف لج

كل زاويه بالبيت تنطق بوجودج

الحمدالله على كل حال .. ارتاحت عند رب العالمين

هذا حال الدنيا اللهم لا اعتراض

ربي يرحمج ويغفر لج

يالله مثواج الجنة يا يمه

انا لله وانا اليه راجعون

هاذي اللي اقصدها :)

يشبهها صح ؟

جيسيكا سيمبسون :P

*الضغط على الصورة للتكبير :>

تشبيه عالسريع :)

الويك اند اللي طاف

مابقى فلم ما شفته من مجموعة افلامي المنسيه

ومن بين هالافلام فلم (Dorian Gray)

كان منه نسخه اولى مثلها josh duhamel

بس كان مليق

وما انكر النسخه المجدده هم مليقه ههههههههه بس مو هاذي السالفه

باختصار اهيا قصة واحد حب انه يحتفظ بشبابه

وعنده لوحه مرسومه له (بورتريه)

وكان يبي يحتفظ بشكله مثل ما اهوا باللوحه

فا باع روحه للشيطان

بحيث كل ما يكبر .. يخطيء .. ينجرح ..

ما تبين فيه هالاشياء تبين باللوحه ..

المهم .. طول الفلم وانا اختي من تمر جدامي بالصدفه

ازعجها بجملة وحده : " شوووفيييييه مو يشبهها؟؟؟؟!! "

واهيا تقول " اي اي خلاص اي يشبهها "

لول

انا الحين بسألكم .. ما تذكركم ملامحه بوحده مشهوره؟

اهيا تكون النسخه الذكوريه منه :P

انتو معاي في هالشي؟

لووول

كب كيك بالدجاج

هلوووو

هاذي الله يسلمكم وصفه كانت واصلتني بالايميل

شكلها كان سهل ويشوق قلت اجربها

وصج طلعت نايس :>

اول خطوه تغلفون فنجان قهوه بنايلون لدواعي النظافه ههههههههه

(هالخطوه من عندي) :Pp

2) تقطعون التوست بالفنجان وتحطونه بقوالب الكب كيك

3) فوق التوست : حميسة شاورما دجاج +فلفل اخضر+بصل وطبعا البهارات والملح

وفوق رشة شبنت .. بالايميل حاطين بقدونس

بس انا فضلت الشبنت .. احب ريحته :)

4) الخلطه البيضا :

3 ملاعق كبيره جبن كرافت + 2 ملعقه كبيره مايونيز + 1 قيمر كي دي دي

5) بالفرن بس من فوق لما يتحمر .. وبس :)

ان شاءالله تعجبكم .. بالعافيــــــــــــــــــة :>

OMG!

ياللهــــــــــول !
مو جنه حفاظا على ماتبقى من عافيتنا ولونا الأصلي :p
وسياييرنا .. لاااااااازم يعطلونا عن الدوامات ؟
رايي نسوي حملة
(خلوها رحمة)
جود يرأفون بحالنا :(
Sent from my BlackBerry® smartphone from Wataniya Telecom

Aero Hot ChOCoLaTe

أثناء جولة سياحية في ربوع جمعية كيفان

طحنا على هوت جوكلت

على ككاو آرو

اهوا شويه ثقيل ويشبع

وحلاته نص ونص ماله داعي تضيفون شكر

بصورة عامة طعمه نايس

:)

=========================

شفت حبيبي ايام المراهقه

حاطين صورته على بودر

يعني اللي يحطه يقلب شاروخان :Pp

مراسلتكم فشه من جمعية كيفان

:>

التــــاج

قوانين التاج السلطاني :

اذكر اسم من طلب منك حل الواجب

الغالية

سلة ميوه

مشكوره حبيبتي على هالواجب من زمان ماصار عندي هوم وورك

:)

و

fatto

مشكورة حبوبه :*

و

العزيزة

مي

مشكوره :*

تحدث عن ستة اسرار لا يكشفها من يقابلك اول مره

1- شكلي هاديه وايد وايد ومايوحي اني جبريت وبسرعه اعصب

ومره زفيت بورتر جدام بنات الدوام ماصدقوا ان هاذي انا لول

2- ان لي فصلاتي وقطاتي .. يعني راعية نكته على قولتهم

واللي يشوفني يقول عني هاديه جدا ومؤدبه خخخخخخخ

3- لما اتحجا بالتلفون .. احب اقط اذوني واسمع الاصوات المحيطه اللي حوالين اللي اكلمهم لول

مو بلاغة شف بس اهتمام زاااااايد عن اللزوم

يعني اللي اكلمها ادري انها تشرب شي لازم اسألها قاعده تشربين شنو؟ هههههه.. احب اكون بالصوره بكل شي لول

4- حياويه واستحي وااااااااااااايد .. وبنفس الوقت جريئة .. قمة بالتناقض ادري

5- اللي يشوفني اول مره دايما يقول عني شايفه روحي ونفيسه .. وانا العكس تماما

وهالانطباع وايد حاشني بالدوام :)

6- احب اخلط بالاكل .. ماعرف اكل شي بروحه

يعني مع العيش لاااازم كتشاب .. لاتعيبون بس صج احبه مع الكتشاب

وعلى طاري الاكل

انا عنيده بالمطبخ وراسي يابس

يعني اذا ما ضبط معاي الشي

اعيده اكثر من مره بنفس الحزه لما اسويه صح
وارتاح نفسيا :>

اهدي هالواجب حق :

4/5

هوبتي

المباركية

Being One

اجتماعي

خاتون

IMG00553-20100530-2104.jpg

خالفونـــــــــــا :(



Sent from my BlackBerry® smartphone from Wataniya Telecom

محتاجـــه أفضفــض

لمحت طفـــل يلعب بين الرفــــوف

يركـــض ولا همه احــد

ضحكتــــه البريئــة وهو شايل لعبتـــه

يوريهـــا أمــــه ويرد يكمل ركضتــــه

يمر يمي واخطف لحظه لمست فيها شعره

سبحان من صور هالبراءة والجمـــال

الله يخليه لأهله ويحفظـــه

وبالصدفة سمعت نفس الطفل يناديه ابــوه

رفعت راسي وليتني ما رفعتـــه

شفته وتوقف بي الزمن لحظــــه

رد في قلبي ذاك الحنين واحلى شعور

صورة كليتي وقاعات الدراسه والممرات

شوقي لذيج الأيام

نفس العيون ماتغيرت

نفس الملامح ما كبرت

تذكرت أيام التخرج

تذكرتـــــه

تذكرت الاعجاب البريء اللي ماكنت ادري عنــه

تذكرت صديقتي تقولي بفترة عقب التخرج " تذكرين فلان؟ "

وانا بابتسامه ارد " اي اذكــره"

"كان مكلمني عنج يبيج .. عقب التخرج بيتقدم لج"

" قال لي آخذ رايج واقولج"

"وليش ما قلتيلي .. شاللي ردج؟ "

" اللي ردني اني انا كنت ابيه ! "

مر هالحوار في خيالي وانا المحه يلاعب ولده

ماتحملت الوقفه .. ضاق بي المكــــان

طلعت وغصة في قلبي كبــرت

ماتحسفت على شي مضى لكـــــن ..

غيمــــــة هدوء سكنتني

مع شويــــة ضبـــاب ...

يـوم ميــــلادي

يمرنــي كـــل عـــــام يــــوم ميـــلادي

يوم اعرفــه ويوم انســى مواعيده

يمرني وانتبـه للغايب البـادي

واهوجس بحال غيـري مـن مواليــده

أرتاع وارتــاح لـه يفرق وهـــو عادي

ينقص من العمــر عــام في ضحى عيــده

HaPpy BiRthDaY 2 Me

;)

===========

شكر خاص لاختي الغاليه

(بنت الديره)

:>

PaNsY

هاذي زرعتي بالدوام أخيرا طلعت. عقبال تصير ورده :p
Sent from my BlackBerry® smartphone from Wataniya Telecom

مزاج الليــــــــــــــل :)

اهديكم هالاغنيه صارلنا مده هابين فيها ومعلقين عليها خصوصا مع الجو الحلوو

اللي حايشنا الحين بو جم يوم هههههههه

الله لا يغير علينا هالبراااااد ;)

My heart goes Boum-Boum-Boum

Every time I think of you

Inside it's Boum-Boum-Boum

Lost control what shall I do?

'Cause I wanna be your lover

Till the end of our lives

I could never miss again

These loving eyes

ان شاءالله تعجبكم

اي صج .. الحين وقت جذبة ابريل

جذبتوا؟ ;)

HaVe A NiCe WEeK EnD ALL :)

كـــوب No more

هلووو شلونكم .. ولهت عليكم :)

حبيت اكتب بوست يديد ابشركم في بشاره حلوه

مسئولــــــــي .. سبب من اسباب تحلطمــي .. قاتل المتعه الصباحيـــــه .. آفة الريــــــوق

السيـــــــــد كــــوب

اخيــــــــــــــــــــــرا تقاعـــــــــــــــــــــــــــــــد

:)

سؤال .. ؟

استغرب من كثرة الفنادق في الكويت .. تلاحظون هالشي؟

سؤال : هل في سياحه بالكويت ؟

ماشوف معالم ومرافق سياحيه تجذب عدد كبير من السياح تستوجب وجود هالكم الهائل من الفنادق لاستيعابهم!

عندنا جم مجمع .. الاكواريوم .. حفلات هلا فبراير

وبس !

===================

سؤال : ليش في سيارات بنات يعلقون دببه والعاب معلقين من رقبتهم بجامات سياييرهم ؟

والا حاطتلي تشكيلة دببه على الطبلون اللي ورا ؟ حق الغبار ..

انزين شنو المنظر الحلو في هالصوره ؟

====================

مره من المرات اللي ودينا فيها امي المستشفى

في غرفة الطواريء كانت يمنا مريضه بينا وبينها ستاره

يتها السستر تسألها عن عمرها ..

السستر : كم أوومريك؟

المريضه: ...

السستر : انتي أوومير كم ؟

المريضه : 55 ... 50 ... 60

السستر : ...

ههههههههههههههههه

سؤال : ليش انخش اعمارنا واوزانا ونعتبر هالشي سر من اسرار الدوله ؟ :>

=================

سؤال : متى يخلص هالاسبوع مليييييييييييييييييييييييييييييييت :<

لما خلصت شغلي حاولت اسلي نفسي بنشاط نسائي بحت :P

سؤال : متى اتقاعد ؟ :P

مزاجي اليوم : هندي :>

اليوم قلت لازم اتفرغ واطالع فلم من مجموعة الافلام اللي عندي واللي ليلحين ما شفت شي منها

ومن بين هالافلام هالفلم الهندي

انا من عشاق شاروخان

احبه من زمااااان مادري ليش هههههههههههه

الفلم يركز على شخصيتين يتلاقون صدفه

وبعد سنين يلتقون مره ثانيه صدفه

وتجمعهم صداقه .. لان كل واحد منهم متزوج وله حياته الخاصه

ويساعدون بعض عشان ينقذون زواجهم اللي يعاني من ظروف متشابهه

يحسون بفراغ وشي ناقصهم ..

الفلم يحكي عن وجود الحب حتى لو متأخر

وتوأم الروح موجود بس لازم الواحد يدوره ..

عموووووما .. الفلم عجبني .. من زمان ماشفت افلام هنديه وعشت جووو ههههههههههههه

بس ماوصيكم .. طوفوا الاغاني :Pp

=====================

نصيحه جمالية :

هالGloss وايد حلو وعجبني

يخلي الشفايف توتيه بلون طبيعي

جربوه ترا نايس :>

======================

هاذي منظره على فيل .. حق شاي الضحى

اذا تبينها .. تلقينها في ستي سنتر الشويخ :)

======================

باجــــــــــــــر ان شاءالله

دوام يا جماعة الخيــــــر .. مستعديــــــن لــــــــه ؟ r;

بالدوااااام

كل شي منعوه بالدوام عندنا :(
ممنوع اللاب توب
ممنوع التجمعات
ممنوع أي نشاط وابداعات فنية لول
ومن القهر قمت اقرا هالرواية ! شسوي :(

Sent from my BlackBerry® smartphone from Wataniya Telecom

جاي مديري

هالبوست تيست اشوف البي البي يشتغل أو لأ

Sent from my BlackBerry® smartphone from Wataniya Telecom

My Blog`s BD

اليوم

My Blog`s FirsT BirThDaY

:)

بتحلطـــم

اليوم ما داومت

وتحسفت آخذها عرضي

على طاري العرضي

ترا يا جماعه ما تكفينا ال 4 ايام بالسنه

:(

حلاته 6 انا راضيه :P

دشيت مصافط المستوصف والا زحممممممممممممممه

خذيت رقم والا رقمي 126 والدور واصل 82 :<

جك بوووم والا تصير نجره وهوشه

بين وحده تتحلطم على ان الدور ما يمشي والطبيبه نفسها مو شي وبتشتكي عليها

جااااان يطفون شاشة الارقام

قلت " امبيه انا مصبحه في ويه منو اليوم ؟ :( شالحظ )

المهم صارت لويه

وانا كانت نازله علي غيمه من الهدوء قاعده بالزاويه العب جيمز (حدي فاضيه)

عقب ساعه ونص يالله يه دوري وافتكيت

طرالي شي .. لو نسوي طبياتنا بروحنا ندز طلب طبيه بسايت المستوصف .. كل واحد عنده فايل ويدش بالرقم المدني والباسوورد .. والدكتوره تدز الرد واحنا بس نسوي برنت ونصدقها .. مو صح خووووش اقتراح :)))

====================

عندي مخالفات تفيد ان حضرتي طايفه الاشاره الحمرا

مع اني ولا مره طفتها ( امممممممم يمكن بس مره ماجذب انا هههههههه )

بس اللي انا متأكده اني اطوفها واهيا صفره .. وماشوف فلاش

فهل صج ان قاموا يصورونا حتى واحنا طايفين الصفرا ؟

اغلب مخالفاتي بتقاطع خالد عبدالعزيز .. وينه هالتقاطع؟؟!!

====================

تلاحظون ان الباصات قيادتهم قياده رعناء؟؟

اكثر ناس اشوفهم دايسين و يبتونون ومستهترين

جنه الحين وراهم شي مهم

واذا طليتوا .. بتشوفون بس راس والا راسين قاعدين

على شنو هالدفاشه والعيله ؟؟

=================

ارد واقول نفس اول

سيارات تعليم القياده المفروض عقب ال 8 يعلمون المتدربين

لان وايد مسوين زحمه بسبب قيادتهم البطيئه

شنو ذنب ناس مستعيلين على دواماتهم واللي جدامهم سياره تعليم سرعتها صفر وبالنص :(

يبطون جبدي

تذكرت اول

لما كنت اتدرب

مدربتي قالت لي فشه اخر يوم بوديج تتمشين على شارع البحر عشان تستانسين

قلت لها لا مشكوره مابي .. حق الشماته يا سعد :Pp

===================

تعرفون عطر اسمه "حجر" ؟

موجود بس بدبي .. توني هابه فيه

لا واسميه صخربالغلط لووول

ترا نايس .. تعرفونه؟ @@

================

بقولكم سالفه قبل لا اروح اشوف فلم the Box

اول يا حلوها امي كنت اتمشا معاها بالليل عقب العشا بالفريج بين البيوت

كان عندي سلحفاة حاطينها بالحديقه .. بس دمها ثقيل :P

مره من المرات

امي تنطرني ابدل عشان اتمشا معاها

واحنا بنمشي شفت بيدها جيس مال الجمعيه

قلت لها "يمه شنو هالجيس؟"

قالت "هاذي سلحفاتج بنغويها "

لووووووووووول

قلت" ليش يمه؟!"

قالت "يقولون اتييب الفقر "

المهم .. خليناها يم باب بيت مانعرفه

خخخخخ

================

تصبحون على خير :)

سالفة قصيره علسريع :)

اليوم بالدوام رفيجتي قالت لي سالفه تضحك

كنا نسولف عن ايام الدراسه والامتحانات

قالت مره بنت خالتها قعدت ورا وحده شاطره (ام قليب) :)

وحاطه في بالها انها بتغش منها اذا توهقت

وفعلا توهقت في سؤال

جان تكتب " شنو جواب س4؟ " على المساحه وحذفتها على البنيه اللي جدامها

وللعلم البنت الشاطره وايد ملتزمه

جان ترد تحذف المساحه على صاحبتنا

لما قرتها والا كاتبتلها " الغش مايجوز "

لوووووول

خرعتــــــــــــــي الصبــــــــح !

اليوم صارلي موقف ما مريت فيه ولا في هالشعور البايخ من زمــــــــــــــــــــــــــــــــان

فزيت وقلبي ناقزني

اطالع الساعه والا 8 الا ربع الصبح

واقول " امبيييييييييييييييييييه مارنت الساعه حق الدوام!!!! شسوي!!!"

وافكر آخذها طبيه والا ادز مسج اني باخذ استئذان .. الخ

وشكلي بالضبط نفس الصوره لووول

وانا متنحه ياني ذكاء .. اقول امس كان شنو؟ تذكرت ان اليمعه

اهني حسيت (بذكائي) ورديت نمت لوووول

مريتوا في هالشي و هالخرعه نفسي؟

:Pp

My Sis`s BiRthDaY :)

قبل جم يوم كان عيد ميلاد اختي

رحنا تعشينا وبعدين

قلنا خل نفصل شويه ونروح نلعب

بصالة الالعاب اللي يم جمعية بيان

:)

اول ما دشينا صرفنا فيش

وشفنا هالحلوه مجابلتنا ههههههههه

اختي تحب اي لعبة فيها مطرقه ههههههه

وهاذي بعد :)



هاذي لعبة تفلعون فيها العتاويه :)


واخر شي ربحنا هالتراجي الكشخه من الكوبونات :Pp


وبعدين رحنا الخباز شرينا كيكه

وهاذا راس صاحبة العيد الميلاد :))



========================

بهدي التاج بما اني ليلحين ملكه يديده وقبل لا يخلص هالشهر

حق اختي الغاليه

..pen seldom

:)

=======================

توا طلبت عشا من شرمبي
ذكرني بهالصوره
واي ياحلووووو الربيان والله جلم قلبه :)
حده كيوت صح :>

HaVe a NiCe WeeKEnD

:)

كل عام وانتوا بخيــــــــــــــر

كل عام وانتوا بخير

عسى ان شاءالله تكون سنة خير وفرح علينا وعليكم

:)

(ادري شويه متأخره) :>