الأحد، مايو 02، 2010

محتاجـــه أفضفــض


لمحت طفـــل يلعب بين الرفــــوف
يركـــض ولا همه احــد
ضحكتــــه البريئــة وهو شايل لعبتـــه
يوريهـــا أمــــه ويرد يكمل ركضتــــه
يمر يمي واخطف لحظه لمست فيها شعره
سبحان من صور هالبراءة والجمـــال
الله يخليه لأهله ويحفظـــه
وبالصدفة سمعت نفس الطفل يناديه ابــوه
رفعت راسي وليتني ما رفعتـــه
شفته وتوقف بي الزمن لحظــــه
رد في قلبي ذاك الحنين واحلى شعور
صورة كليتي وقاعات الدراسه والممرات
شوقي لذيج الأيام
نفس العيون ماتغيرت
نفس الملامح ما كبرت
تذكرت أيام التخرج
تذكرتـــــه
تذكرت الاعجاب البريء اللي ماكنت ادري عنــه
تذكرت صديقتي تقولي بفترة عقب التخرج " تذكرين فلان؟ "
وانا بابتسامه ارد " اي اذكــره"
"كان مكلمني عنج يبيج .. عقب التخرج بيتقدم لج"
" قال لي آخذ رايج واقولج"
"وليش ما قلتيلي .. شاللي ردج؟ "
" اللي ردني اني انا كنت ابيه ! "
مر هالحوار في خيالي وانا المحه يلاعب ولده
ماتحملت الوقفه .. ضاق بي المكــــان
طلعت وغصة في قلبي كبــرت
ماتحسفت على شي مضى لكـــــن ..
غيمــــــة هدوء سكنتني
مع شويــــة ضبـــاب ...

هناك 79 تعليقًا:

ميمة السبيت يقول...

** واااااااااااااااي حفيرة لو انا منج جان شبيت فيها و طفيتها بنعال

الجودي يقول...

هذه مو صديقة بالمرة ولا عرفت الصداقه !!

تدرين احتمال يتكرر الموقف بعد مدة و تكونين أم الولد و نفس الرجل في الإنتظار و نقرأة البوست بالمقلوب ...

الدنيا عجيبه ...

Q8 TeaCHeR يقول...

@@

اهيــا كانت تبيــه !؟
ونعم الصديقــه

واهيـا اللي كانت معاه عشــان صج احتـر والا لأ ؟

AuThoress يقول...

يااااه ..
صمتت مثلك تماما .. هي هكذا ، حياة بمجملها تعب .. كم من النساء تشبه تلك الصديقة ، تقطع جدول السعادة الذي يود التسرب نحوك بقدمها ..؟

كم واحده منهن مررن بك / بي ..؟
ارفعي رأسك عاليا ، نحو الله .. هو من يسمع فضفضتك.. ويمسح على رأسك.

Made n Q8 يقول...

وتوها تتحجى لا غلطانه

وامبييه شلون تبي واحد قايلها ان ابي صديقتج!!

aL-NooR . يقول...

هذي ابدا
مو صديقة
هذه عدوة/انانية
و مريــضة




واللي معاه ..اهية ؟
طرشيلي رقمها بزفها :@
و انسوي حملة اهني ضدها :@@
***************

رورو الشخبوطه يقول...

وااي بطت جبدي..

اوكي مو نصيبج بس ردة فعلها غريبه خوش رفيجه المفروض تفرح لج مو تخرب عليج والادهى اهو ليش يعتمد عليها :\

الله يعوضج باللي احسن منه يارب..

حَافِـيَةُ الَقَدمَيّـنْ ولِبَاسِي المَطـرْ يقول...

مممم
كل وحده تبي مصلحتها هالايام يا فشّه


وبالله المستعان

bent el deera يقول...

رفيجتج تصرفها سخيف بس هم أقولج لا تتضايقين هذا ماكان نصيبج ولا نصيب اللي كانت بتوقف نصيبج .... والله انج سكره وعسل والله خاش لح اللي أحسن منه

ماتدرين الخيره لج وين حبيبتي :***

والله يكدر اللي يكدر خلقج

Ƒiona H. Al- Ƨharekh يقول...

عجيب هالبوست
يعطيج ألف عافيه يا وخيتي =)

شاي الضحى يقول...

للأسف هذي ما تستاهل تكون صديقه لانها ما تبيلج الخير

وكل واحد ياخذ نصيبه


الله يرزقج الي احسن منه يااااااااااااااااااااااااااااارب

غير معرف يقول...

حقيرة :(

عورت قلبي حسيت نفسي بالموقف :(

GodFather يقول...

hi....hi
fishah
والله انقهرت عليج وماني عارف اردعلى الفضفضة شي يبط الجبط لو صاريلي انا جان حطمت الدنيا ويمكن اروح فيها بس صراحة اهنيك على الصبر وردي راح يكون قصيدة يمكن تعبر عن الحال حبيتها لان لها معنا ويمكن ذكرتها اكثر من مرة:
لرشفت يا حلم العمر حسرة فؤادي والقهر لما بعد كل هالسنين قدام عيني تنكسر
ما كنت يا حلمي تطيح أو ترضى لعيوني تصيح جيتك وأنا كلي أمل رديتني وقلبي جريح
يا قلبي الوافي الحنون يلي على أحبابك تهون من علم إللي تحبهم تبني المحبة ويهدمون
يا قلبي روح وقولهم إنك يتبقى ظلهم وإنك بعد مثل الوطن مهما عطى ما ذلهم

لأني لومهما حصل مازال عندي أمل إن الأماني ما تموت وأحلامي في يوم تكتمل

الضحـك ماهو علامة مستريح ,,, والبكـا أحيان ما
يـوحي بحـزن
خـذ
مثل مني أنا قلبي جريـح ,,, وابتسم لك من غـرابيل وشجـن
وان
بكيت يجوز أبكي من صحيح ,,, من جرح من ظلم من صدمة زمن
أو
يجـوز أبكـي عشان أستريح ,,, أو نتيجة شـوق أو حزن أو نـدم
السوال اهي اشلون عايشة وضميرها اكيد ميت...........

Fishah يقول...

ميمة السبيت

اي لها سوالف الله يسامحها مادري شلون صايره .. والمشكله اني كنت اطوفلها .. الحمدالله والشكر انا واااايد طيبه :(

بس عجبتني طريقتج ههههههه

:)

Fishah يقول...

الجودي

لا بالمره .. بس كنت عميا للاسف :<

اي صاجه .. احتمال كبير اكون بعدين طرف في قصة احد ثاني مثلي :)

بس ترا شعور مو حلوو :(

شاكره لج مرورج .. مشكوره :*

Fishah يقول...

Q8 TeaCHeR

أهليــــن حبيبتي

اي والله .. اتصدقين انا واااايد انقرصت من رفيجاتي :<

لا ما كانت اهيا .. خذا وحده تصير له

اهيا نظريتها الظاهر اذا مو حقي فا مو حقج بعد :\

عثماني يقول...

اسعد الله مساج

:)

هذا حال الدنيا

تجربة من التجارب اللي مجبورين نتعايش معاها

:)

لكن انا اكتشفت شي

:)

اكتشفت ان ورا هالمدونة روح شفافة جميلة .. لم تجد حرج بالبوح بمشاعرها

جريئة بمشاركة قرائها بما تعرضت له

و قبل هذا كله

اسلوب ادبي رائع

استطعت ببراعه ان تمسك بانتباه القارئ ... حتى النهاية

حفظك الله... امين

Hope يقول...

امبي o_O
من صجها!!
خوش رفيجة والله
آخر زمن
بدال لا تفرح لج.. حاطه عينها عليه
صج ما تستحي.. لا و توها تكلم و تقول
الله يعوضج خير و يعطيج على قد نيتج

Twinkle يقول...

حلوة هذي ( اذا مو حقي مو حقج بعد )
صج في بنات فيهم انانية فظيعة مو بس انانية ذاتية الا انانية تعدت الذات
مادري شلون يفكرون

ماعندهم سالفه كلش الله يهديهم ان شاءالله

اما فشتنا :)
فسبحان الله ، مازال هناك داعي للابتسامة
ولا تضيقين خلقج .. أكيد خير ..

رنداالجنوبية يقول...

لاتضيقين خلقك حبيبتي ولاتفكرين بذي السالفه انسيها وربي بيرزقك اللي افضل منه.. انا معك انه قهر وحركه بشعه من اللي اسمها صديقه .. ولكن مالك نصيب فيه
(( عسى ان تكرهوا شيئا وهو خير ا لكم وعسى ان تحبو شيئا وهو شر لكم ))

انتي انسانه رقيقه وطيبه وروحك حلوه

وفقك الله واسعد ايامك .

Fishah يقول...

AuThoress

أهليــــن

هذا اللي الله كاتبه لي مثل ما كتب انها تكون رفيجتي .. الناس معادن .. قليل تلقين منهم المعدن الطيب والصاحب الوفي ..

الله كريــــم :)

اشكرج وايد على الكلام الحلو والمرور الاحلى :*

Fishah يقول...

Made n Q8

أهليــــن

الغيره وانا اختج .. كان عاجبها ..

تصير هالمواقف وايد للاسف .. وايد ناس خربوا على ناس جذي واكثر :(

Fishah يقول...

aL-NooR .

أهليــــن

لما ارد اتذكر مواقفنا .. توني استوعب ان صج فيها انانيه بصوره مو طبيعيه .. كنت احبها ما شفت عيوبها :)

هههههههه خوووش حمله والله .. حبيتها :))

مشكوره :*

Fishah يقول...

رورو الشخبوطه

أهليـــــن

لو قلبها ونيتها صافيه جان فرحت لي واستانست ..

ماااااادري :\

ان شاءالله .. الله كريم :)

مشكوره حبيبتي :*

Sweet Revenge يقول...

:) شلونج فشة ان شاء الله تكونين بصحة وعافية
سبحان الله وتسمي نفسها صديقة اعوذ بالله من الحسد اظن فشه لازم تاخذين حذرج منها وانا لو منج ابتعد عنها صراحة ,لو يبيها جان خطبها بس لاحول ولاقوة الا بالله , ومتي ما شفت ناس تبي تاذيج تذكري الاية{ولا يحيق المكر السيئ إلا بأهله} سورة فاطر
والاكيد ان ما كان لج نصيب فيه وان شاءالله المرة الياية انت تشوفينه مع عياله واهوا يشوفج مع عيالج :)

بنت أحمد يقول...

تجنننننننننننننننننننن

يعطيك ألف عافية

تسلم الأيادي

Mai يقول...

لا حول ولا قوة الا بالله
ليش جذي الناس صارت, لييش
قهر .. بس ما تدرين شالخيرة بالموضوع .. ربي يعوضج خير ان شاء الله من هالصديقة بأوفى ومنه بأحسن ..

chandal/danchal!! يقول...

موقف يستحق الفضفضة باسهاب

اتمنى تكونين بخير بعد البوح وتفاعلنا معك

وبالاخير كله قسمة ونصيب ويا رب يعوضك باللي احسن منه

Fishah يقول...

حَافِـيَةُ الَقَدمَيّـنْ ولِبَاسِي المَطـرْ

أهليـــــــن

الله كريــــــم ..

:)

Fishah يقول...

bent el deera

أهليـــــــــــــــن

اي والله خيره ..

بعد عمري .. يا زين كلامج :***

:)

Fishah يقول...

Ƒiona H. Al- Ƨharekh

أهــــــــــلا أهـــــــــــلا

الله يعافيج ويسلمج حبوبه .. حياج الله :)

Fishah يقول...

شاي الضحى

أهليــــــــن

اي والله نصيب ..

ان شاءالله .. يسلموو حبيبتي :*

:)

Fishah يقول...

غير معرف

أهليـــــن

موقف بايخ وايد .. ما قدرت اتحمله .. وبالسياره عيوني غورقت :(

شكرا على هالمرور الحلوو .. يسلموو :)

Fishah يقول...

GodFather

أهليـــــن

يسلموو على القصيده .. فعلا كلماتها حلوه

عايشه نفس هالناس .. كثير من نفس شاكلتها يعيشون بينا وما همهم شي ..

مشكور :)

Fishah يقول...

عثماني

أهليـــــــن

وياكثر التجارب اللي بنمر فيها بعد ..

الله المستعان :)

كلماتك ومرورك الاروع اخوي .. فرحتني بوجودك .. مشكوور :)

Fishah يقول...

Hope

أهليـــــن

عاد لو تدرين شكثر كنت احبها واعزها ...

الله كريــــــــــم :)

مشكوره :*

Fishah يقول...

Twinkle

أهليــــــــــــن

وايد بنات جذي طبعهم .. الله يهديهم ..

اتصدقين ردودكم ووجودكم اهوا اللي مفرحني ومنسيني الضيجه .. حسيت بوقفتكم معاي :)

شكرا من القلب :***

Fishah يقول...

رنداالجنوبية

أهليــــــــن

اهيا كانت اخر وحده افكر انها تسوي فيني جذي .. كنا اكثر من خوات .. اقعد في بيتها اكثر من بيتنا .. هذا اللي حرني وقهرني ..

اي والله نصيب .. خيـــــــــره

آميـــــــــــن يا رب :)

مشكوره على هالطله الحلوه :**

Fishah يقول...

Sweet Revenge

هــــــــــلا حبيبتي :)

الله يعافيج ويسلمج من الشر

انا معاها افترقنا ومن زمان ماسمعت اخبارها ..

آميــــــــــــــن يا رب .. يا حلو هالدعوه .. حبيتها :))

مشكوره :***

Fishah يقول...

بنت أحمد

هـــــــــــــلا والله بهالطله

الله يعافيج ويسلمج حبوبه :)

شاكره لج مرورج :>

Fishah يقول...

Mai

ان شاءالله :)

مشكوره حبيبتي :*

Fishah يقول...

chandal/danchal!!

أهليــــــــــــــن

قلبي متروسه يا جندل :(

حبيت تفاعلكم معاي .. ردودكم اسعدتني .. حسيت انكم خففتوا عني هم وافكار حاشتني .. الله لا يحرمني منكم ومن طلاتكم يااااارب :)

مشكوره :**

bhr.qadsaweya يقول...

شي يحر و يبط الجبد

وشعووور حده كريه

ما كان رزقج و انت تستاهلين الأحسن :))

___
ادري متأخر

بس
كل سنة و انتي بأالف و صحة و سلامة


يعطيج العافية حبيبتي

she is me يقول...

تدرين؟
اهوا ما كان نصيبج .. فلا تزعلين
وهي ما تستاهل تكون رفيجتج .. فهم لا تزعلين
ولا تفكرين .. ترا محد خسر غيرها أما إنتي فأنا متأكدة ان حواليج ناس ورفيجات صجيين مو أنانيين ويحبونج صج ويتمنونلج الخير
لا يضيق خلقج .. الموقف قاسي .. صح .. بس ما يستاهلون زعلج .. صدقيني

أحمد الحيدر يقول...

وعسى ان تكرهوا شيئا وهو خير لكم ..

Engineer A يقول...

فضفضة تعور القلب!

وتعبيرج عن الموقف بهالكلمات رائع ومعبر..

دمتي بخير

خاتون يقول...

صديقتج هاذي حسود صج لي قالوا
"لوما الحسد ما مات أحد"
أحياناً القدر يحمل لنا شي أفضل من اللي أحنا راح نختاره
^_^

Her يقول...

waay 3awarty galbe:/ alla yakteblech ele a7san mena enshalla w yjazeeha enshalla...now I remember why I stopped making friends :(

Fishah يقول...

bhr.qadsaweya

أهليــــــــــــن بالمختفيه :)

وانتي بخير حبيبتي تسلمين .. مشكوره :**

نصيب :)

حياج الله :)

الآء يقول...

السلام عليكم ورحمة الله و بركاته

والله موقف صعب لا تحسدي عليه الله يعطيكِ القوة و يصبرك

دمتي بخير :)
هذه زيارتي الاولى في عالمك الرائع

Fishah يقول...

she is me

أهليــــــن

حبيبتي والله :*

خيـــره ..

لا مو زعلانه .. بس تضايقت .. انا بسرعه يبين علي :<

مشكوره :)

Fishah يقول...

أحمد الحيدر

أهليــــن

اي والله خيـــــره ..

مشكور على المرور اخوي :)

Fishah يقول...

Engineer A

أهليــــن

حبيبتي والله .. طالما انتو معاي بهالكلام والوجود الحلو .. انا ان شاءالله بخير :)

اسعدني مرورج :*

Fishah يقول...

خاتون

أهليـــــن

اتمنى ان شاءالله :)

مشكورة :*

Fishah يقول...

Her

أهليـــــــــن

حبيبتي والله .. ان شاءالله :)

مشكورة :*

Fishah يقول...

الآء

وعليكم السلام ورحمة الله

الله يعافيج ويسلمج حبيبتي :)

اسعدني مرورج الاول واتمنى ما يكون الاخير .. حياج الله :*

اقصوصه يقول...

اممم

اللي يعيش يشوف

واحنا في الحياه نعيش عشان نشوف

نشوف ونتعلم :)

هوبتي يقول...

حبيبتي ...
اولا هاد قسمه ونصيب
ثانيا ..عسي ان تكرهوا شيء وهو خير لكم
يمكن الله شايل ليكي شيء كبير غيره واحسن في الدنيا او الاخره ...

بتعرفي انا حبيت واحد سنتين واعدت سنتين مشان انساه

وبسبب انفاصلي عنه ان اهله رفضوني واهلي رفضوه لان كل من الطرفين شافونا مش مناسبين لبعض

هو هسا متزوج وعنده بنت صغيره

وانا كمان انا علي حطت ايديه ...

كنت بعتقد انه اليوم الي راح يتركني فيه راح اموت ...ما راح اعيش

لكن هنيني عايشه ما شاء الله عليا مافي احسن مني


انسي حبيبتي ولا تخلي شيء متل هيك يضايقك
لانه مش نصيبك ولا رزقك

Hesham يقول...

اولا انا سعيد جدا انى وجدت مدونه كويتيه حيث ان لى فى الكويت ذكريات جميله رغم انى لم اعش فيها الا نحو 9 اشهر فقط ولكنها تركت اثرا جميلا عنها وعن شعبها المسالم واول مايؤكد ذلك هو تلك الكلمات الرقيقة المكتوبه والتى تدل على رقة جميله
تمنياتى بالتواصل

جنّي يقول...

السلام عليكم

لا تتوقف الحياة على فرد .. ولا تتوقف لصديقة لا تعرف معنى الصداقة ..

سيبدلك الله خيرا منه ان شاء الله ..

اهلين بزيارتك

تحيتي

HeRmOsO ♥ يقول...

نآآس غريبة والله :(

عشنا وشفنا ...

باحث عن حب يقول...

اولا
اول مره ادخل مدونتك الجميله دى
ثانيا
النصيب
محدش عارف
نصيبه
فين
حلوة
االفضفضه
ممكن اضيف
مدونتك عندى

Fishah يقول...

أقصوصة

أهليــــــــن

الحياه تجارب .. نتعلم منها .. نتغير منها :)

يسلموو على المرور الحلوو :*

Fishah يقول...

هوبتي

أهليـــــــــن

الحمدالله على كل حال .. شي مكتوب :)

انا معاج صعب تنسين مرحله في حياتج وتعتبرينها ولا كأنها موجوده ..

الله يعوضج حبيبتي باللي احسن منه وان شاءالله تكونين دايما بخيــــير :*

يسلموو على المرور العسل :)

ReLaaaX يقول...

اخنقتني العبره !
خليتني اعيش معاج الموقف :/


حبيبتي انتي .. ببساطه لأنج تستحقين احسن منه :)


سبحان الله يقولج الله يسلط الظالم على نفسه شوفي شلون فكرت بهالكيد عبالها بتاخذه على قولتها ماتدري ان بهاللي خذته ربج يسلط عليها فيه وشلون ينقلب حاله وياها مع ان قبل لا تاخذه على قولتها كان احسن :))

fatto يقول...

اخخخخخخخخ ودي اسبها شنو هالانسانه ..



بس كل من ياخذ نصيبه

5/4 يقول...

متى بتكتبين بوست يديد ترا حدج بدعتي

تحنين علي ردي وردي وانتي سلحفاة بالعالم التدويني ما تكتبين شي

وبعدين شيلي ياني!

5/4 يقول...

بعدين خل تاكل تبن هذي الله ياخذها مع ويهها الخايس

حدها باب الحاره

لوووووووووووووول

q8-lawyer يقول...

أولا: هذي ماتستاهل تقولين عنه رفيجه

ثانيا: الله بعوضج بأحسن منه يااارب

ثالثا: ماشاءالله إسلوبج بالكتابه روعه:)

Fishah يقول...

Hesham

أهليــــــن

وانا اسعد بتواجدك بينا :)

فرحتني بزيارتك الاولى واتمنى ماتكون الاخيره .. حياك الله :)

Fishah يقول...

جنى

أهليــــــن :)

صحيح ان الحياه لاتتوقف لكن بعض المواقف صعبه مهما تناسيناها تجول بالخاطر بعد فتره :)

ان شاءالله يا رب :)

فرحتيني بمرورج .. حياج الله :)

Fishah يقول...

HeRmOsO ♥

أهليــــــــــن

وياما بنشووف وبنشوف .. الله المستعان ..

سعيده في هالزياره الحلوه .. يسلموو :)

Fishah يقول...

باحث عن حب

أهــــــــــلا أهـــــــــلا :>

مرورك الاجمل .. يسلموو :)

الله كريم ..

اسعدني مرورك .. واضافتك مدونتي عندك :)

حياك الله

Fishah يقول...

ReLaaaX

أهليـــــــــــن

حبيبتي والله .. يا حلوو قلبج واحساسج :*

الحمدالله خيــــــره .. ماتدرين الله شنو كاتب ..

ياحلو مرورج .. حياج الله :**

Fishah يقول...

fatto

أهليـــــــن

ههههههههههههه حبيبتي والله .. ادري الموقف يحر .. خيـــــره وانا اختج ..

يسلموو على المرور الحلوو :*

Fishah يقول...

4/5

أهــــلا أهـــــلا سيسووو :>

شسوي .. تدرين ظروف الشغل .. والبزنس والبورصه :Pp

ان شاءالله ماطول بين بوست وبوست :>

مااارااااااااح اغيره .. احبه ياني :)
عندج اقتراحات ؟ سمعيني شي حلو واغيره ;)

هههههههههههههه باب الحاره .. الله يقطع ابليسج .. انا مايضحكني الا لما تقلدين صوتها لووول

احبج :**

Fishah يقول...

q8-lawyer

أهليـــــــــــــن

اي بس كنت احبها ما كنت اشوف المساويء اللي فيها .. والا لما اتذكر وايد مواقف صارت لي معاها .. بس هذا اقوى شي :(

ان شــاءالله يــــــارب :)

يسلمووو حبيبتي .. مشكوووووره :**

حيـــــــاج الله :)

نينا ريتشي يقول...

كيف أقول بأنها صديقة و هي لا تحمل أي صفة من صفات الصداقة , إنسانة منافقة أنانية تحب الحصول على شيء حتى لو كان لغيرهاأو سيكون لغيرها , أنا لا أسميها إنسان لأنها بلا ضمير ما فائدة الإنسان إذا كان بلا ضمير بلا مشاعر إنسانية ؟!!؟ حتماً سيكون فظاً غليظ القلب .

و الله شي يقهر شوي و أبجي يمكن لأني حيل عاطفية من هالناحية لأنني منذ سنوات لم أحس بطعم الحب و حلاوته لكن الإيمان و حلاوته لست متأكدة بأني ذقت حلاوته لكنني متسمكة به إلى آخر يوم في حياتي .

الخيرة فيما اختاره الله , و الله يعوضج برجل أحسن منه , نحن لا ندري ماذا يخفي لنا القدر ؟ فالرضى بالقضاء و القدر يجعل الإنسان يرضى بما يحدث له في حياته حتى و لو كان شيء مؤلم متعب لكن لا بد أن يأتي يوم و ينسينا كل أحزانناو همومنا التي أحسسنا فيها من قبل .
الحياة جميلة بحلوها و مرها..
و الله يرزقج بكل ما تتمنين و كل ما تحلمين به ..
أختج:
نينا ريتشي

Fishah يقول...

نينا ريتشي

أهليــــن

بطبيعة الحال دايما تمر علينا نماذج من الناس دخلناهم حياتنا وتفاصيلها وبالنهايه ننصدم فيهم صدمه قوية اللي للاسف القلب ما ينسا هالصدمه مهما مر عليها من وقت .

الحمدالله على كل حال حبيبتي .. خيره ان شاءالله .. ماتدرين الله شنو كاتب :)

اشكرج على هالكلمات واحساسج الرقيق والدعوه الحلوه :**

اسعدني مرورج الاول واتمنى ما يكون الاخير .. حياج الله حبوبه :)