My new boss

Unfortunately i really HATE my new boss !!!!

!

صج وناسه عطله
بس ليش المولد النبوي 3 أيام ؟
أنا قاريتها غلط ؟
Sent from my BlackBerry® smartphone from Wataniya Telecom

كـــوب No more

هلووو شلونكم .. ولهت عليكم :)

حبيت اكتب بوست يديد ابشركم في بشاره حلوه

مسئولــــــــي .. سبب من اسباب تحلطمــي .. قاتل المتعه الصباحيـــــه .. آفة الريــــــوق

السيـــــــــد كــــوب

اخيــــــــــــــــــــــرا تقاعـــــــــــــــــــــــــــــــد

:)

ليش ؟

ذاك اليوم وانا افرفر بهالقنوات

طحت على لقطتين

مت عليهم من الضحك

قلت لازم تشاركوني حتى لو في ابتسامه

:)

يعني متنكر .. انزين ليش ؟ ليش هالمنظر ؟ :P

واهني مسلسل بالقناة الاولى .. انزين ليـــــــــــــــــــش مسوي في روحه جذي ؟!

=============================

مديري فيه طبع مو حلو

يسوي الشي ويقطه براس احد

سوا فيني موقفين جذي

مره وحده رفض نقلها وقال لها فشه ماتبيج معاها بالقسم !

انزين ليــــــــــش هالحركه البايخه ؟؟

البنت ماعرفها اول مره اشوفها .. وبعدين انا شكو بالقسم؟ وكنت توني يديده عندهم مورئيسة قسم عشان اختار البنات اللي فيه!

وانا اشوف البنت لما طلعت من مكتبه عطتني نظره مليئة بالحقد والكراهيه .. وانا ياغافلين لكم الله اقول حق رفيجتي شفيها تطالعني جذي؟ ههههههههههههههههههه

وقبل يومين صار الموقف الثاني :

وحده تبي تنقل .. وللعلم مالي شغل بالمره في معاملتها واوراقها

بس مادري ليش من تشوفني اتييني

وتتحلطم على راسي وتصارخ .. وسبحان الله من تصارخ تنزل على راسي غيمه من الهدوء

اكلمها بكل هدوء وود :)

قالي مديري اقولها اتييب اوراقها من مكان عملها الاصلي واتيي من باجر عشان تكمل النقل

ماعجبها الكلام لاني بعنيها مره ثانيه وبيتها بعيد وماصارت نقل خذا كل هالوقت .. الخ

لما طلعت ناداني مديري

جان يقول لي : سوي فيها كتاب رفض !

انزين ليــــــــــــــــش !

مو من البدايه المفروض يقولها انها مرفوضه ! ليش وعدها وبعدين يسوي من وراها جذي !

من باجر انا اشوا كنت مستأذنه ما حصلت طشار منها

رفيجتي تقول يت على طول تقول " وينها هاذي" ؟ لووول

حدها نجريه اعوذ بالله :<

مسئولتي حاسه بمعاناتي .. مره قالت لي

انتي على طول بالجنه لا حساب ولاعقاب الله يعينج

:)

=========================

ذيج المره رحت تروفاليو

شريت هاذي .. عجبني شكلها :)

===========================

يايني فضول على اخونا المدون

"طماشه"

وينه؟ @@

=======================

امس انا واختي كنا طالعين

شفت طيارات اتونس

اقولها صوريهم

تقولي استحي هههههههههههههه

صورت لكم بس هاذي

===============================

اختي من النوع اللي ماتمسك ايدها

وطبعا بس تشتري كتب

ارخص مره شرت فيها كتب

كان تقريبا شي وخمسين

لاتشوفوووووووون غرفتها من جبال الكتب :)

وهالشهر لما خصموا وايد منها

وانصدمت

قالت حق الماستر كارد ByeBye

===============================

وبس :>

HaVe a niCe WeekEnD :)

منوعات ويك انديه (3)

قبل جم يوم يبت حق الدوام هالكيكه

تذكرونها؟

:)

ادري حدها غبار .. بس حلوه .. كانت حبي من كنت ياهل

حتى البنات ذبحوني بكلمة "شخباااااااااااااااااااااااااااااااااري فشه .. من وين يايبتها" :P

================================

طبعا بدون لا اسأل " من هازا يا هازا"

تعرفونه :)

بس كان خاطري اقول صيغة السؤال :P

=================================

مره من المرات لاحظت سياره مجكنمة متروسه عمال

السايق معلق بالمنظرة "نجمة شوارفسكي" (احس طيح حظ النجمة) :P

ياللي تدورون هالنجمة .. بس خلاص لاتدورونها :P

==============================

يايتني حاله هالايام

وانا بالسياره

اضغط على ضروسي حيل

وما الاحظ هالشي

الا لما اوصل حق الوجهه اللي ابيها

استوعب عقبها .. واحس اني فكي يعورني :(

شالحل ؟ ؟

==========================

يوم السبت حطوا فلم غيشا

تذكرت رورو

اتصدقون اني حبيت الروايه اكثر

فيها تفاصيل واحداث وحتى شخصيات اكثر

بالفلم وايد مغيرين اشياء

مادري ليش يغيرون .. احس يخربون القصه ويبيخونها :(

==========================

آخر بدليه من بدلياتي

كتبت كتاب رسمي ودزيته حق المراقب

دق علي وسألني

فشه شنو يعني ( الفون الفا ) ؟

لوووووول

قلت امبيه كنت اقصد ( اربعون الفا )

حسيت نفسي ياهل :P

===========================

بناءا على طلب اخوي GodFather

رسمت لكم مديري .. مو تضحكون

:)

===============================

اتمنــى لكــــــــــــــــــــــــــــــــــم ويــك انـــــــــــــد سعيــــــــــــــــــد

:)

معاناتي

صباح الخير بس شويه متأخره

نظرا لغيابي اللي شويه طال عذروني

بسبب اني كنت في دوره تدريبيه .. عقبها كان جهازي مخنزر :P

بسولف لكم عن سالفه تقرقع في قلبي

( قلبي متروسه )

امس وكعادة كل صباح اروح الدوام متأخره

واحاتي الحق على البصمه او لأ

وعلى طاري البصمه

هالايام الجهاز مايقبل بصمتي مادري ليش

الظاهر راحت الخطوط من كثر ما احرقه في الفحمة لما احط بخور لووول

رفيجتي تقول فينا جفاف مانشرب ماي من جذي راحت الخطوط

اتهقون صج @@

ادخل مكتبي

اتفاجأ اني بروحي

زميلاتي من سوء حظي وحده غايبه والثانيه مستأذنه

بسولف لكم عن طبيعة مسئولي

اهوا من النوع اللي ماتدرون شنو يقصد بالضبط

شخصيته لها عدة جوانب

شفنا الجانب اللي يعاملنا بكل رسميه وعلاقة تكاد تكون اقرب الى الابوية

وللاسف هناك جانب آخر.. جانب جدا جدا بايخ

ولاني بروحي

للاسف شفت الجانب اللي جدا جدا بايخ

يؤسفني حال اللي يتصرفون هالتصرفات

مادري هل المنصب او العمر اللي يبيح لهم هالتجاوزات

ناداني المكتب

عطاني شغل

وسأل عن احوالي

جااااااااااااااااااااااااااااااااان

يقط علي كلمه جنه ماااايدري لووول

قمت ابووولع بريجي

وانا قاعده اقول بقلبي يا ربي هذا شنو ارد عليه!

نزره ونزرت عليه من قبل

وحقران وحقرته

غياب وغبت لول

حتى البنات مساكين اذا كنت بروحي

ودخل مكتبي .. معودتهم ادق عليهم بس رنه على طول اييوني

اقولهم اي انتوا محارمي ههههههههه

سكت جني ما سمعت

قلت له خلاص عيل بو فلان اول ما اخلص هالكتب ادزهم مع المراسل

وطلعت

وعلى فكره

مو بس انا اللي حايشها هالطشار

من جذي انا شويه متطمنه

:P

عموما

حبيت افضفض لكم

واللي مصبرني بيطلع تقاعد احتمال قريبا

ما اقول

الا

" ان الله مع الصابرين "

:)

تفلسف زايد

في فئه من الناس لازم يتفلسفون على اي شي

لازم يعني يوحون لك انهم الفاهمين اللي يعرفون كل شي

بس اهم اللي يعرفون السنع والترتيب

بس اهم المرجع اللي لازم الواحد يسألهم اذا توهق بشي معين وعندهم الحل

مروا علي 2 الحين .. فيهم هالطبع

اول وحده .. من تدش المكتب ..

لازم .. " حطوا لكم طاوله اهني "

"ييبوا مفارش"

"غيروا مكان هالمكتب"

"سمجتج ييبيلها حوض اكبر" ... الخ

هاذي بالذات ما اتقبل منها شي .. وااايد تتفلسف وان اهيا اللي تعرف الترتيب واحنا بدونها الصراحه حدنا مانعرف شي ومبهدلين p:

ماعلينا .. طبعا هاذي .. طااااف p:

الثانيه .. داقه على رفيجتي وزميلتي اللي معاي بالمكتب

رفيجتي من عرض السوالف تقولها انها بتراجع الدكتوره الفلانيه حق ولدها النونو اسم الله عليه

وان مادحينلها هالدكتوره وجذي

هذيج على طوووووووووووووووول ردت عليها "لااا لااالا لاتروحين لها هاذي"

"ليش شفيها؟ "

"هاذي انا رايحتلها وماعجبتني .. عطتني دوا حقي مو ذاك الزود"

طبعا رفيجتي علامة استفهام (؟) لونها وردي فوشي فوق راسها هههههههههههه

" بس هاذي دكتورة اطفال حديثي الولادة!"

شفتوا التفلسف يا ناس :)

هاذي ( سموكة ) العضو اليديد في مكتبنا :)

*************************************************

اليوم صار جدامي موقف يضحك

كان عندنا مقابلات توظيف

فا كذا بنيه قاعدين بالقنفات اللي جدامي

وشاءت الصدف ان 2 منهم بنص السالفه قطيت اذوني عليهم لول

الاولي : انا اعرفج .. امبله جني اعرفج .. مو انتي بالمعهد الفلاني؟

الثانيه : اي ..

الاولي : اييه انا اقول اني اعرفج .. ماعرفتيني؟

الثانيه : لا

الاولي : امبله اكيد تعرفيني .. بس يمكن لاني توني متنقبه من جذي ماعرفتيني .. ( ورتها ويهها ) .. وماكنت احط مكياج ..

الثانيه : اي اي امبله جني اعرفج .. مو انتي كنتي تلبسين عبايه كذا وكذا

الاولي : ايييييييييه

الثانيه : مو كنتي بالماده الفلانيه ..

الاولى : اييييييه اييييه انا

الثانيه : لا ماذكرج ..

انا بمخي : !!!!!%!!!؟؟؟!$!!#!!!!

لووووووووووووووووووووووووووووووووووووووووووووووووول

طبعا صج صج ضحكت .. والبنات اللي معاي صج متنا من الضحك

(لاتعلييييييييق)

************************************************

هبينا ناكل يوز اخر الدوام

لان يقولون انه يقوي الذاكرة

واحنا حاليا بدون مبالغة

حايشتنا حاله من الزهايمر المبكر

مالقينا كساره

فا اشكالنا كانت بدعه واحنا ندور شي نكسر فيه

اخر ما وصلنا اليه

وحده تفلعهم بالخرامه خخخخخ

وانا اكسرهم في برج بيزا المائل ( تذكار من وحدة ) .. يؤدي الغرض لووول

****************************************

امس سوينا اضراب مؤقت اول ما قالوا عن الانفلونزا اللي حاشت

مكدونالدز

اتوقع هاذي الاشاعه طلعها واحد مل واهوا ينطر دوره

فا حب يخلي المطعم فاضي p:

****************************************

(سؤال يطرح نفسه)

بما ان تجارة الرقيق حرام

وضع مكاتب الخدم الحين

واسعارهم والجشع اللي حايشهم ومعاملتهم

واشكال الخدم قاعدين بالممرات يطالعون اللي رايح واللي ياي يبون بس احد يختارهم

شنو موقعها من الاعراب؟ :(

الصراحه .. يكسرون خاطري

********************************************

HaVe A NiCe WeeK EnD :)

منوعات ويك انديه !

آخر ما وصلنا اليه بحملة التجميع الخيرية P:

ادري ادري .. شكلهم ما وصلوا حتى 30 هههههههههههه

شنسوي .. نحن قوم لا نحب شرب الماء p:

***********************************************

من زمان وانا احب اشوف هالفيديو

صج صج صج حبييييييييييييييييييييييييييييييييييتهم

:)

******************************************************

نكته اليوم : شرطية واقفة بالدوار وتيبب .. ليش..؟

" ناسيه صفارتها" خخخخخخخخخ

******************************************************

مسئولي بالدوام ... " تبا لك" !

" مع الاعتذار لحقوق صاحب الكلمه .. تسلفتها منك ترا "

****************************************************

تحلطم الضحى

سميت هالبوست حزة الضحى بس ياني شغل ولووووويه وتلفون

فا صار الحين الظهر لووول

بس هذا ما يمنع اني راح اتحلطم خخخخخخ

*******************************************

اول شي

اليوم وانا بطريج الدوام ( ياااا دي الدوااااااااام اللي بس اسولف عنه )

ادري ادري قثيتكم فيه بس ميخالف اموووون :>

المهم

يه على بالي شي لما توني بدش وبدرعم عل الدوار

ليييييييييييش كنا 3 لاينات وبالدوار 2؟ ليييش هالفقصه؟ وياكره اللي على اليسار والوسط يتناجرون منو اول يمر !

المهم اقتراحي يقول : رجاءا نبي الدوار 3 لاينات خخخخخخخ

*********************************************

ثاني شي

لفت نظري ريال كويتي لابس دبله

فا يه على بالي اقترااااااااااااح

ليش مو كل الرياييل الكويتيين المتزوجين يلبسون دبله؟

وعشان جذي يه على بالي خوووش اقتراااااااااح

ليش مايفرضون الدبله على الرياييل نفس حزام الامان .. ويخالفون اللي ما يلبسون لوووووول

*********************************************

ثالث شي

ليش نداوم من الصبح؟؟ على الاقل المفروض دوامنا يبدي من ال10

الواحد يشبع نووووم .. يلعب رياضه .. يتريق .. يقرا جرايد

يعني يسوي اي شي

مو كله ويوهنا منصفقه وخط المخده على خدودنا مايرووح لوول

ويالله نبطل عيووونا ومالنا خلق حتى نتحجا :(

********************************************

رابع شي

بما انه الصبح كل واحد عباله الشارع له برووحه

ويلفوون على الاوادم ولا جنه احد يمهم

فا اقترااااحي يقوووووووووول

ليييش ما نحط على سياييرنا المطاط اللي محطوط دار مدار سيارات التصادم (نفس اللي بالملاهي)

ويكون على كل السيارات باختلاف احجامها وانواعها

واللي يحطها ما يخاف من السيايير اللي حواليه

ترا شي :)

وبسسسس نشكر لكم حسن استماعكم وتعاونكم هههههههه

اخر اخبار الدوام

اليوم بالدوام

لاحظت بودره لونها فوشي

خوش لون لول

وفيها جم نقطه مصوفره

موزعه بزوايا ومتاهات الدوام

ياربي نطالع ندور شنو ذيس باودر؟ عبالي بقايا تحفر والا شي .. والا البودر اللي يحطونه بالفازات

اخر شي طلعت بودره فيران !!

وحده لاقيه بمكتبها فار صغيرونو .. فا عقبها خذوا الاحتياطات

ههههههههههههههههههههههه

عاد احنا قلنا انا والبنات

بودرتنا محليه .. بنحط فلفل اسود .. مره قريت في ايميل شغله جذي

عاد مادري صج هالشي او لا .. مثل ما قالو عن النعناع يوخر القارص

بس على فكره لحد يعلق على دوامي .. المبنى يديد والله خخخخخخخ

حملة تجميع ..

بالدوام .. وكالعاده يمي بطل ماي صغير (ماشربه بس اقص على روحي اني اشرب ماي) :(

رفيجتي قالت " انتي تشربين هالماي؟ "

قلت لها اي ..ليش؟

" انا سمعت من مرت اخوي .. انج اذا يمعتي 1000 غطا من مغاطيهم .. يعطونج وييل جير .. تتبرعين فيه حق اي مستشفى انتي تختارينه"

قلت الله وناسه .. وليش ما قلتي وانا صار لي قرن اطلب بهالكراتين حق اهني والبيت :(

المهم .. سوينا حملة تجميع بالدوام .. حتى المراسل قاعد ايمع معانا لول .. قمنا نحطهم في فازه كبيره

على امل انهم يصيرون 1000 ( اقص ايدي اذا يمعنا 100) لول

عاد والله عندي احساس يقول .. اني اذا دقيت عليهم اسألهم صج هالحجي؟ بيقولون لي .. شخباري .. انتي من وين طالعه .. هالشغله احنا قلنا عنها وطافت خخخخخخ

بس عادي .. لقينا هدف في الحياه لوووووول

احلى شي عقب الويك اند .. الاحد .. كل وحده تطلع من جنطتها 6 او 5 ميمعتهم من البيت :)

وعلى طاري هالصوره

عندي اعتراف خطير خخخخخ

فيني عقده طفوليه وليلحين معاي

ماحب اشوف هالابراج

اخااااااااااااااااااااااااااااف :(

كنت حلمانه اني غرقانه في وحده منهم بالليل وماقدرت اطلع

لووول بس خلاص لحد يضحك

والحين اذا مريت يمهم والله جد .. اصد عنهم :(

هذا اعتراف اليوم .. بيني وبينكم اوكي :)

عنوة علفاضي ..

اليوم بالدوام مسئولي وصاني اييب حبر حق البرنتر مالت مكتبي

فا قلت اوكي

عطاني من (العهدة) مادري (السلفة) مالت المكتب عشان اشتريه

وقال اذا كفى .. زيدي من عندج دينارين .. واشتري علبتين

قلت اوكي

(مشالله علي كله مطيعه ) p:

المهم

عقب صلاة العشا .. رحت حولي .. وكانت طبعا وكالعاده حدها زححححححححححححممممممممممه

وصلت الشارع اللي بين محلات الكمبيوترات والذهب .. انا بلاين الذهب .. اطالع الجهه الثانيه بشوف اي محل يوحي ان فيه احبار .. جان اشوف للاسف رفيجتي (السابقة) .. طبعا متحاربين (سوالف بنات) لول لازم نتحارب

قلت ايييف قطيعه هم زحمه وهم اشوفها :(

المهم

ماااطول السالفه

باختصار .. رحت المحل .. لقيت نوع الحبر .. طبعا شكله جنه قذيفه .. قلت له جم؟

جان يقول الهندي : 32 دينار !

- " والله صج ؟ "

- " اي شووور 32 دينار "

- " انا مسئولي معطيني عشر دنانير قال لي ييبيلي 2 فيهم "

لووووووووووووووووووووووووول

فشله :( طبعا الهندي والكاشير ضحكوا علي :(

خخخخخخخخخخ استحيت

خذيت قذيفتي .. ورديت البيت :>

فضفضة

دايما الواحد لا نقل من كذا مكان بدوامه طلعوا فيه العيب

وان اهوا الغلطان

ليش ما يقولون والله مكانه كان غلط مثلا

ليش مايكون مسئوله من النوعيه اللي الواحد ما يتحملها بالمره

ليش ماتكون المجموعه اللي معاه اهيا الغلط . وان مهما حاول يشغل نفسه بالشغل ماكو فايده ..

ليش مايفكرون انه الدوام عمر .. سنين من عمرهم تروح واهم قاعدين .. مو يوم والا يومين .. ليش الواحد يقضيها بالحسد وتزلق الوايرات والحش والقيل والقال

مو غلط الواحد يدور لين يلقى المكان اللي يريحه

صج ان مافي احد مرتاح ( شعندها رويشد ) p;

وحتى لو ارتحنا والله عوضنا بمكان .. لابد فيه (شي) يضايقنا

بس .. حبيت افضفض :(