الثلاثاء، أكتوبر 27، 2009

معاناتي

صباح الخير بس شويه متأخره
نظرا لغيابي اللي شويه طال عذروني
بسبب اني كنت في دوره تدريبيه .. عقبها كان جهازي مخنزر :P
بسولف لكم عن سالفه تقرقع في قلبي
( قلبي متروسه )
امس وكعادة كل صباح اروح الدوام متأخره
واحاتي الحق على البصمه او لأ
وعلى طاري البصمه
هالايام الجهاز مايقبل بصمتي مادري ليش
الظاهر راحت الخطوط من كثر ما احرقه في الفحمة لما احط بخور لووول
رفيجتي تقول فينا جفاف مانشرب ماي من جذي راحت الخطوط
اتهقون صج @@
ادخل مكتبي
اتفاجأ اني بروحي
زميلاتي من سوء حظي وحده غايبه والثانيه مستأذنه
بسولف لكم عن طبيعة مسئولي
اهوا من النوع اللي ماتدرون شنو يقصد بالضبط
شخصيته لها عدة جوانب
شفنا الجانب اللي يعاملنا بكل رسميه وعلاقة تكاد تكون اقرب الى الابوية
وللاسف هناك جانب آخر.. جانب جدا جدا بايخ
ولاني بروحي
للاسف شفت الجانب اللي جدا جدا بايخ
يؤسفني حال اللي يتصرفون هالتصرفات
مادري هل المنصب او العمر اللي يبيح لهم هالتجاوزات
ناداني المكتب
عطاني شغل
وسأل عن احوالي
جااااااااااااااااااااااااااااااااان
يقط علي كلمه جنه ماااايدري لووول
قمت ابووولع بريجي
وانا قاعده اقول بقلبي يا ربي هذا شنو ارد عليه!
نزره ونزرت عليه من قبل
وحقران وحقرته
غياب وغبت لول
حتى البنات مساكين اذا كنت بروحي
ودخل مكتبي .. معودتهم ادق عليهم بس رنه على طول اييوني
اقولهم اي انتوا محارمي ههههههههه
سكت جني ما سمعت
قلت له خلاص عيل بو فلان اول ما اخلص هالكتب ادزهم مع المراسل
وطلعت
وعلى فكره
مو بس انا اللي حايشها هالطشار
من جذي انا شويه متطمنه
:P
عموما
حبيت افضفض لكم
واللي مصبرني بيطلع تقاعد احتمال قريبا
ما اقول
الا
" ان الله مع الصابرين "
:)

هناك 36 تعليقًا:

Fantaseyah يقول...

بعد عمري والله

مره ثانيه ما نخليج بروحج
موو احنا جربنا عليه كل شي وماكو شي نفع معاه !!! والله كائن غريب استغفر الله...
على قولتج نصبر والله كريم

بس شفتي شلون هالسالفه خلتج تكتبين بووووست عشان احنا نقراه وناسه :)

رورو الشخبوطه يقول...

هلا فيج هلا..

وبردتج هلا ..

البصمة تتليعن انا قصيت اظافري من سبتها :(

واخيس شي لما تبصمين ويكونون مجدمينها :(

وشقال @@

خل يولي قوليله عمي خل يتعقد خخخ..

خلصتي السجينه شرايج فيها؟؟

مشكوره خيتو..

اقصوصه يقول...

امممم

الله يسامحج

رفعتي ضغطي من صباح الله خير

معقوله في ناس جيه؟

جبريت يقول...

مو الخوف يطلع اييكم اخس منه

بس لو منكم انا احكه بشكوى احوله للتحقيق اخليه يتأدب

bent el deera يقول...

حبيبتي لج وحشه :**

ومسئولج اشكره قوليله احنا بمكان عمل هالكلمه مو لايقه ولا تمشي مع هالمكان

واذا ما فاد روحي حق احد بمنصبه او اعلى منه ويكلمه واذا كلش ما فاد ماكو الا تشتكين عليه بس خلي يمج شهود لان بالشئون القانونيه ماياخذون بشكوى ما فيها شهود

..pen seldom يقول...

مرحباً بعودتك فشه ..

أشتقنا لصوتك -- يعني تدوينتك :)

وما يشوف جهازك شـر ..

.. وإذا كان هذا مديركم ..

الله يعين قلوبكم عليــه ..

وإن شاء الله يتقاعد --- أو يطردونه أفضل ..

؛)

أرق التحـايا لكِ ..

سمو الأميرهـ ..ツ يقول...

ربي يكون فعونج ..

هالنوعيه ما ينفع معاهم غير التطنيش :\ ..

سوي له أكبر طااف ..

والله يعينج على ما بلاج ..


تقبلي مروري
ودمتِ بود :)

fatto يقول...

اهلا اهلا :) اشلونج شخبارج ..

شالمدير الي مايستحي .. اشوه ان بيذلف عنكم.

نمووول يقول...

لا مبين البنت قلبها متروسة

حمدلله على السلامة مطول الغيبات جاب الغنايم
وين الغنايم ؟

بس اذا مشغولة بدورة فهذا شي زين ويطمن
الله يوفقج ان شاء الله

اجهزة البصمة شكلها صينية انا مرة حطيت صبعي بمكان
بصمة واحد من الشباب انقبلت

بس ما عرفت شنو سالفة مسؤلج
زين ليش تغير لما صرتي بروحج كان يخاف يعني
لما يكون معاج احد ولا شنو ؟

الله يعينج ويسهل لج امورج

دمتي بخير

اجتماعي يقول...

أهلا بالقاطعة ..
نورتي التدوين بعد طول انقطاع : )

الله يعينج على هالمسؤول ..
وقرت عينج مقدما على تقاعده :d

{~المباركية~} يقول...

صباح النور
سالفة التأخير عندي مش ولابد
بس الحمدلله الدكاتره و المهندسين معاي حلوين يتأخرون بتسجيل الغياب هي هي ماكو بصمه
لوول شنو نظام مسؤولكم بيصير المسؤول المثالي

star يقول...

الله يعينج والصبر مفتاح الفرج :)

حَافِـيَةُ الَقَدمَيّـنْ ولِبَاسِي المَطـرْ يقول...

@@ يا عوينتي
ترى والله ما أأيد إن المسؤول يكون ريال
شنو هذا بالله طلع واحد ما يخاف الله
لا وبقسم فيه بنات صغار وحلوات
صراحه يا تتحملوا p;
أو تطلبون نقل , وتشتكون عليه
ولا يستلمج كل ما غابوا رفيجاتج
,
الله يعينكم تخرجتوا من الجامعه
على امل مكان زين
حتى الأمل طلع خرطي

reemas يقول...

عودا حميدا
و الله يعينج على هالنوعيه من المسئولين
الله ابتلانا فيهم في كل مكان
بس لا تشتكين بدون شهود
لانها شوشره علي الفاضي و ما تاخذين حقج و يوقفون معاه اذا ما قدرتي تثبتين عليه شي
طنشي و شيني النفس عليه و الله يكون بعونج
انا مبتلش بمسؤوله عندها جنون الشك
لو اروح الحمام اعزكم الله تحسبني رايح اسوي مؤامره عليها !!!

الله كريم
و بالرغم من محتوى الموضوع اسعدتنا طلتك

تحياتي :)

Fishah يقول...

Fantaseyah

المره اليايه اذا ماراح تداومون دزولي مسج عشان الف فوق تحت وارد بيتنا :<

عاد حلاته ارد لكم بسالفه حلوه :<

الله كريم :<

الله لا يحرمني منكم :**

Fishah يقول...

رورو الشخبوطه

أهليـــــــــــــــــــــــن

أهنن أهنن :**

:)

امبيه حتى انا قلت يمكن هذا حل عشان تقبل صبعي
اصلا لو تشوفين صبعي .. نتفه لووول

مره قلت له انت مثل ابوي لووول

اتصدقين السجينه ما كملتها .. حلوه .. بس حسيت ان كل من سبقني وقراها .. جان اهون .. شعور غريب :<

حياج الله حبيبتي :*

Fishah يقول...

اقصوصه

انتي ارتفع ضغطج .. عيل انا شقول وانا في قلب الحدث :<

الله كريم

اي في ناس جذي واكثر بعد :<

الله يستر علينا وعليهم

حياج الله حبوبه .. نورتي :))

Fishah يقول...

جبريت

اي احنا خايفين من عبارة راح نقولها مستقبلا " ماتعرف قديري لين تجرب غيري " :<

لا مابي سوالف شكاوي .. فشله وفضيحه ماتسوا علي :<

حلاته أأجر صعيدي يفشش توايره لوووول

اسعدني مرورك .. حياك الله :)

Fishah يقول...

bent el deera

أهليــــــــــــــــــــــــن

هلا هلا :)

مشكلتي ماعرف اجعم جذي :<
وبعدين سالفه الشكوى اخاف منها .. كافي فيها فضايح وقيل وقال .. ماحب :<

اللي مصبرني انه بيطلع تقاعد

بس الصج
ترا اهوا مرات زين ومرات شين

الله كريم

ياما في الدنيا مظاليم :P

حياج الله حبيبتي .. ونسني مرورج :**

Fishah يقول...

pen seldom

مرحبتيـــــن .. اهليـــــن وسهليـــــــــــن :)

انا اشتقت لكم وايــــــــــــــــد :*

الشر ما اييج ان شاءالله هههههههه الحين الحمدالله صار احسن

:)

الله كريم ..
لا الطرد حرام .. يكسر الخاطر :)

فرحني مرورج يالغاليه .. حياج الله :)

Fishah يقول...

سمو الأميرة

اي والله .. اي هاذي السياسه المتبعه الحين :)

الله كريم حبوبه ..

اسعدني مرورج الاول .. اتمنى ماتقاطعيــــــــــن

حياج الله

:)

Fishah يقول...

fatto

أهليـــــــــــــــــــن .. هلا وغلا :>

الحمدالله بخير

اممممممممممم

هذا وانا ماقلت لكم التفاصيل لاعت جبدكم :<

بعد عمري ونسني مرورج الحلو :)

Fishah يقول...

نمووول

أهليــــن

الله يسلمك .. هاذي غنايمي .. مواقف باااايخه :<

اجمعين ان شاءالله .. كانت الدوره خفيفه وظريفه :>

انا الظاهر صبعي نتفه .. مساحة مكان البصمه كبيره عليه ههههههههههههه

مسئولي الله يستر عليه .. يستغل الفرص ..

آمين يا رب

حياك الله اخوي :)

Fishah يقول...

اجتماعي

أهليــــــــــــــن :)

شكرا شكرا .. يسلمووو :)

بويه نبيك ههههههههههههه (عجبني التعليق)

حياك الله اخوي سعد :)

Fishah يقول...

{~المباركية~}

أهليـــــــــــن

واي ياحلو التوقيع .. احنا توا صارلنا جم شهر حاطين لنا بالبصمه بالاداره وبلشونا فيها :< حسبي الله على عدوهم

مسئولي نظامه (لاتعليق) هههههههه

اسعدني مرورك .. حياك الله

:)

Fishah يقول...

star

اي والله ياوخيتي .. صاجه :)

اسعدني مرورج يا حلوه .. حياج الله

:)

Sweet Revenge يقول...

السلام عليكم شلونج فشة
يبا ديري بالج هاليام الدنيا تخرع
والصراحة تصرفج عدل
لاتدخلين عليه بروحج ,مسكين مو منه خلاص قام يخرف
خل التعامل معاه في اضيق الحدود اذا لازم اصلا
والله يحفظج يارب

bhr.qadsaweya يقول...

ولكم باك

ميخالف شتسوين بعد ادعي له بالتقاعد والله يفرجها عليكم ان شاء الله ..

يعطيج العافية

GodFather يقول...

HI......HI
FISHAH
اهليين عاش من شاف التعليقات تصديقين fihah من فترة طويلة قلت يمكن تركت البلوق وما راح ترجعين بس الحمدالله شفنا تعليقاتك استانسنا ولو اني متاخر في الرد سوري.
بصمتك على ضمانتي نطري شوي وراح افجر كل اجهزة البصمة في العالم مع عصابتي او احط لهم صبغ او تدرين لاتهتمين منها عطيها طاف اذا مابصمت في اي يوم يمكن تتخترب وخليها علينا انا والعصابة نخربها لك .
*******
اما مديرك بوخرطوشة الحبر البخيل تتدرين شنو يبيله صرخة فى المكتب وخلي اللي ما يشتري يتفرج ووريه العين الحمره مصخها علشان الموظفين والكتبه والفراشين ويتطمشون عليه ولا تخلينه يتقاعد الا واهو ماخذ خوش زفة سنعة ترى النوعية تخاف و ما تستحي بس صوري صورته وحطيها في التعليق الجديد وخلينا نعرف الشخصية البهميية ونطيح فيه تعليق بعد ماتحطين له شوية ميك اب وبعض الرتوش تخلينا نستلمه التعبان البخيل ونخلي المراهق طماشة البلوق او تدرين عندي فكرة جهنمية يبي قشور موز ومن تسمعينه ياي قطيها علشان يزلق ويطيح وتخيلي شكله وهو طايح ويتدربح على ويهه هههههههههههه بصرحة مت من الضحك على الفكرة ويون الموظفين ويشوفون المدير الانتيكة طايح صج منظر اعتقد ما له ويهه يتفلسف عليك
********
ماعلينا الحمد الله على السلامة على الانقطاع الطويل

Fishah يقول...

حافية القدمين

هلا بهالطلة :)

امممممممممم
لو اقولج سوالفه .. تطقين على راسج :<

الله كريم .. بنصبر وأجرنا على الله

ماااقدر انقل لاني اصلا ناقله حق الادارة .. احس فشله يبين في ملفي اني انقل وايد :<

بعد عمري .. حبيت تعاطفج معاي هههههههههه

تشكرات خيتوو .. حياج الله :*

Fishah يقول...

reemas

أهليـــــــــــــــــــــن

شكرا شكرا :)

اي والله .. قثه استغفرالله
قمت اكره قومة الصبح :<

ماراح اشتكي .. الصراحه اخاف + استحي + فشله وفضيحه :<

بسكت وبطوف .. اي الحين انا متبعه سياسة النفس الشينه ..

الله كريم .. والله يعينك انت بعد على بلواك .. الظاهر المنصب يخلي الواحد يستخف :)

يسلموو اخوي على المرور .. ولو ان كان ودي رجعتي تكون بموضوع فرفوشي :)

حياك الله :)

Fishah يقول...

Sweet Revenge

أهــــــــــــــــــلا أهـــــــلا :)

الحمدالله بخير حبوبه :*

اي انا مخليه حلقة الوصل بيني وبينه المراسل .. يودي له المعاملات
بس هم مقروده .. يناديني :<

بعد عمري تسلمين .. مشكوره :**

Fishah يقول...

bhr.qadsaweya

هلا بأهل البحرين والله :)

الله كريم .. مشكوره حبوبه

:>

Fishah يقول...

GodFather

أهليــــــــــــــــــن

عاشت ايامك .. يسلموو :)

حسبي الله على اللي حط البصمه .. مادري ليش حاطينها ! ادارتنا بروحها صغيره

ههههههههههههههه استحي اصرخ .. يطلع لي صوت وصواصه لووول

انا قايله يمكن أأجر لي جم صعيدي يقومون باللازم .. بس دام عصابتك موجوده وجاهزه ماقول لأ .. ادزلك العنوان والوقت اللي يكون فيه موجود وشووفووا شغلكم لووول ( مجرمه )

تبون صورته؟ الحين ارسمه افاا عليك بس هااا لا تضحكون لوول

امبيه اذا طاح ترا جد شكله بيكون صج بدعه .. الله لا يبلينا .. العياب عند الباب ههههههههههه

الله يسلمك .. تشكرات :)

flaanh يقول...

الله يعينج على مسؤولج وعلى البصمة..

كان مسؤولي جذيه ..بس ما سويت له خاط بااط ..قدمت استقالتي ع طول ..ولين اليوم يدقون علي يقولون رجعي ضااع القسم بدووني ..

خلج قوية ..وما عليج من احد..

الله يوفقج

Fishah يقول...

flaanh

أهليــــــــــــــــــن

الله كريم ..

بعد عمري .. اثر هالاشكال وايد منهم :<
انا ماقدر استقيل .. سويتها مره .. وانقرصت :<

الله يعين الجميع .. ويوفقج يارب

طمنيني عليج :*

حياج الله :)