السبت، مايو 02، 2009

ودي ..




مادري ليش طرالي هالشي الحين

ودي لما اتزوج تكون عقب قصه او سالفه صايره

مو زواج تقليدي وخلاص

ودي نفس سالفة اول سمعتها



عن بنيه برمضان كانت بتودي صحن لقيمات حق خالتها .. وحاطه حنه بشعرها .. وبعز الحر اختربت سيارتها

جان توقف بنص الطريج .. والا مر يمها واحد شافها متوهقه .. نزل من سيارته .. سألها عسى ماشر وجذي .. قالت له .. ماشر اختربت سيارتي بس دقيت على اهلي وقاعده انطرهم .. قال لها انزين انا انطر يم سيارتج وانتي ركبي سيارتي فيها مكيف وبراااد عن هالحر .. قالت لا مشكور انا انطرهم .. عاد يقولون انه تبوسم وقال لها .. مو عن شي .. بس الحنه قامت تسيح .. لوول .. المهم طاااف الموقف

وعقب اسبوع .. رن جرس الهاتف .. فاذا بوالدة الفتاه ( اسلوب متعوب عليه ) خخخ ترد على التلفون والا وحده تسلم عليها وتقولها " انا داقه بخطب بنتكم حق ولدي" .. امها تقول اي بنيه؟ انا عندي 3 بنات .. قالت " البنيه اللي كانت حاطه حنه "


وااااااااااااااااي احب سوالف جذي :)


وسالفه ثانيه .. يقولون واحد كان رايح عنده معامله في البنك .. فا واهوا جدام الموظفه .. لفت نظره انها كانت لابسه مظاعد ( عاد مادري شلون تنكتب)
وسبحان الله عجبه صوت مظاعدها جان يخطبها لووول


وعندي بنت رفيجة امي .. شكثر خطبوها .. وسبحان الله ماصار نصيبها .. الا مع واحد كانت توها طالعه من لفة فريج بيتهم جان يدعم سيارتها
ومشالله عقب هالموقف تزوجوا :)
بس طبعا استغفرالله مابي دعمه قويه خخخخخخ


ودي لما اتزوج .. تكون سالفه حلوه .. تضحك .. غريبه .. اهي اللي ادت حق هالزواج :))



هناك 8 تعليقات:

Momentum يقول...

يعني أعلنتي الحرب على البحث عن توأم الروح نفسي؟؟؟

.. للكلمات بقية يقول...

مومنتوم
ويينج ؟ وين مدونتج ؟

موااقف حلوه لها تاريخ يتسجل بدفتر الافراح

fatto يقول...

لووووووووووووووول سالفه الحنه اتيين وموتيني ضحك والله ..


ذكرتيني ابسالفه امي مسكينه .. كان عمرها 18 سنه عمر الزهور .. ادعمتلها واحد ... جان ينزلها وصارخ عليها ( انتييي عمياااا ماتشووووفييين ) لوووووووول حبيبتي امي والله .. والله شباب هاليومين اطلعو احسن واذرب من شباب اول .. على طوول زواج .. لووووول

GodFather يقول...

hi
يا Faishah راح ادز ولدي يدعم سيارتك بس اخاف تطلع سيارتك كوبيه او ميزراتي واخر لحظة تغيرين رايك وتبين تعويض عن سيارتك المدعومة وتقطين ولدي على صخر يرجع لي ادفعله فلوس التصليح وعاد مايندرى جم تصليح السيارة او تطلع خطه منك تبين تصلحين سيارتك المختربه ويفلس ولدي من العرس وانا اضيع المهر على سيارتك تدرين عاد عندي خطة اوديكم المدينة الترفيهية واخليكم تعلبون بالسيارت الكهربائية ودعمو على كيفكم
اوتبون طيارات المعلقة علشان تطيحون من فوق ويصير خوش لقاء في الهواء......!!!!خخخخخخخ

Fishah يقول...

GodFather
=========
اووووه عاد انا بتغيير الراي عند ويهك بسرعه اهون خخخخخ
امممممممممم لقاء بالهواء راح نكنسله لاني اخاف من الاماكن المرتفعه :(
والمهر باخذه مو حق التصليح .. بشتري سياره يديده احسن :>

Fishah يقول...

Momentum
========
اييييييييييييييييييييييي :>

Fishah يقول...

للكلمات بقية..
==============

مواقف وايد بس هذا اللي ذكرته للاسف

Fishah يقول...

fatto
=====
لووووووووووووووووول مسكينه امج كسرت خاطري
انا لو يصيرلي موقف الحنه .. اتوقع بيقولي وع شخباري حنه صج عتيجه .. فمان الله خخخخ