السبت، أكتوبر 03، 2009

اعترافات غيشا + أسئلة نمووول



اخيرا خلصت من رواية اعترافات غيشا

تحكي عن حياة بطلة الرواية ( سايوري )

فترة طفولتها مع اسرتها المكونه من والدها صياد السمك ووالدتها اللي كانت مريضة

واختها الكبيره

بعدها تغيرت حياتها لما باعهم ابوها

وافترقت عن اختها

وبعدين صراعها مع غيشا متسلطه في البيت الجديد اللي عايشه فيه

وشلون اثبتت وجودها وصارت غيشا مشهوره

وعلاقاتها مع الرجال اللي صادفتهم في مراحل حياتها المختلفة


عموما بصورة عامه

روايه تستاهل الواحد يقراها ولو انها طويله وفيها تفاصيل زياده شوي

مثل طريقة وصفها الكيمون ( اللبس الياباني ) والوانه وتطريزه .. الخ

مع اني استغرب قوة ذاكرتها .. لانها تسرد لنا احداث صارت لها من 50 سنه تقريبا

( انا الاسبوع اللي طاف ماذكر شنو سويت لوول )

وفي حوارات اهيا تقولها .. احسها سخيفه .. او بالاصح يعني مو وقته .. عبيطه :)

يعني مثلا في موقف انها قاعده مع رجل وحالته النفسيه حدها موشي

ويشكيلها الحال

واهيا ردة فعلها .. ولاشي .. بس تسأله " اصب لك ساكي" !



عجبتني طريقة تشبيهها حق الاشياء مثل : " تتباهى بثوبها الداكن كالقمر في ليلة ضبابية" و " كان ينظر الي كما ينظر الموسيقي الى آلته قبل ان يبدأ العزف .. بود وحنان "

:)


في الربع الاخير من الرواية .. حقدت عليها .. ليييييش سوت جذي هال... وال... ههههههههه

وبالاخير ماتوقعت النهاية بتكون جذي


اول روايه طويله اقراها .. والصراحه استمتعت في قراءتها :)


================================


بالنسبه حق اسئلة اخوي نمووول :


اسم مدونتك ( المعنى وسبب اختياره ؟ )

معناه السمجه

يمكن لاني احب البحر وايد .. واحب السمج

طرا علي جذي .. حبيته لانه اسم خفيف
و ( ظريف ) :)

الجنس ؟

Female


لماذا تدون ؟

ادون عشان تشاركوني سوالفي

لاحساسي بانها مساحه اشارككم فيها بجزء صغير من حياتي


لمن تدون ؟

لكم انتم .. عالمي الآخر

عائلتي الثانيه :) ----> ( مسبحي ) هههههههه عدل نمووول ؟ ;>


عن ماذا تدون ؟

مو عن شي محدد

ادون عن كل شي يخطر في بالي

افكاري .. فضفضتي .. تحلطمي


قدوتك في الحياة ؟
الى الآن ما احس ان عندي
شخص ممكن اني اقتدي فيه


هدفك في الحياة ؟
- اترقى في وظيفتي
- اعيش حاله من الطمأنينة
- يكون عندي اسرة
- يذكرني الناس بالخير


اوصف نفسك بسطرين ؟
باختصار احس اني حبوبه .. طيبه .. قلبي ابيض
ماحب ازعل احد او اضايقه
اجتماعيه الى حد ما
انطوائية .. خجوله ( ويهي بسرعه يصير احمر ) :P
امممممم انتوا شنو ممكن تزيدون على صفاتي؟ @@


اكثر صفه تنطبق عليك ؟

مزاجيــــه


كاتبك او آديبك المفضل ؟
على حسب الكتاب او الرواية بغض النظر عن الكاتب
بس لما ابطل الجريدة افضل اني اقرا حق
الاستاذ/ فؤاد الهاشم


شاعرك المفضل ؟
خالد الفيصل


اين ترى نفسك بعد ١٠ سنوات ؟

اتمنى ان شاءالله اني اكون في منصب حلو في دوامي

ومن الناحيه الشخصيه

اني اكون في بيتي وبين عيالي ال6 :P


كلمة لقراء مدونتك ؟

شكرا لانكم معاي .. شكرا لتواجدكم .. لردودكم وتواصلكم

وسامحوني اذا في اشياء ما عجبتكم في مدونتي المتواضعه

:)

هناك 60 تعليقًا:

..pen seldom يقول...

صبــآح الخيـر ,,

بصرآحـة شديتيني اقرأ الرواية ,,

إن شاء الله تكون في مكتبة جرير ,

وراح أشتريها ,,

-- تحمست لها --


.. وأيضاً ..

أنا أحب جداً أن أتواجد في مدونتك ,

أسلوبكِ جميل حقاً :)

أجد نفسي أبتسم مرغمة دون أن أشعر

,,

كوني هنا دائماً ...

وأنا في الجوار ..

تحياتي لكِ ..

نمووول يقول...

اممممم اسم الروايه غريب انا مالي بالروايات وايد
تصبله ساكي استغفر الله مو الساكي اهو المنكر ؟ عدل ؟ ههههه

اي عدل عدل مسبحي ..
انا عاجبني الاسم وايد
زين شنو سالفتكم كل البنات مجاوبين على اكثر
صفه هي (مزاجيه) يعني تاثير الجو ولا شنو ؟

شكراً على تلبيه الطلب والاجابه على الاسئله
دمتي بخير ..

طماشة يقول...

الرواية احسها عبيطة لولها شي يضحك.. مم تنصحيني اقراها؟

والله يوفقج يارب وتحققين كل اللي في بالج آمين ان شالله.. شمعنى 6؟ :d
وانشالله دوم قلبج ابيض علشان تصيرين:

فيشة قلبها أبيض على وزن فضة قلبها ابيض لول

{~المباركية~} يقول...

انا عندي كتاب حدده سقيل بس نوعا ما حلو
مثلا يقول انا ضايق خلقي يقعدلي يفصل شلون ضايق خلقه يقول انه قلبه يرقع ومادري شنو يتفلسف لي

لوول الحين عرفنااج عدل وضحت الرؤيه

رورو الشخبوطه يقول...

السلام..

هالقصه كل من يمدحها ولها فيلم ودي اشوفه..

طلعت مزاجيه خخ حسبالي انا بس تيني عرات ..

ازيد صفة العفويه احسج وايد عفويه ماشاءالله..

ويارب يصير عندج يهال صالحين عليج وعلى ابوهم :)

اجتماعي يقول...

الروايات الطويلة تملل وايد ..

ذكرتيني بأول رواية أقراها
"مئة عام من العزلة"

حق "غابرييل غارسيا ماركيز"

مع إنها حلوة وفاز فيها بجائزة نوبل ..
بس ماعجبني فيها إنها طويلة

فأخاف أقرا "اعترافات غيشا" وأكره المؤلف :)

=====

يحليلك يا نمول ..
أسئلتك سوت ضجة كبيرة :)

الله يوفقج ..
ونشوف عيالج الـ 6 كلهم مدونين :)

*Being One يقول...

القصه شكلها وايد حلوه و انتي شوقتيني اني اقراها , من وين شريتيها ؟

أمم صفااتج تووونس عاد حتى انا بسرعه ويهي يحمر على اي شي
كل ما امدحوني او قالو عني شي احس حرارة بويهي و الناس يضحكون علي يقولونلي ويهج حمر ههههه قمت اتضايق لانه يفضحني بعض المرات P:
و صح كلام رورو احسج عفووية و مشالله عليج ونيسه و بسرعه تدشين القلب معني ما عرفج شخصيا بس هذا الانطباع اللي خذيته عنج :)
تشكراااات

حَافِـيَةُ الَقَدمَيّـنْ ولِبَاسِي المَطـرْ يقول...

احس الروايه ما تشجع
خصوصاً غلافها :(
..
فشّه ما احسج مزاجيه
احسج مشالله طول الوقت تضحكين وبشوشه p;

My Books and Me يقول...

أنا أشتري كتب بس أتمقل فيهم وإنتي تقرينهم

شفتي شلون؟ =P

Fishah يقول...

pen seldom..

اهــــلا اهــــــلا :)

اي اهيا من جرير .. بس الله يعينج فوق ال 700 صفحه :>

وجودج الاجمل يالغاليه .. تسلمين .. وان شاءالله دووووووووم الابتسامه ماتفارقج :*

حياج الله :)

Fishah يقول...

نمووول

اي استغفر الله .. هذا اهوا المنكر .. اللي قاصين علينا بالافلام يسمونه عصير :P

من قلت عائلتي ومسبحي تذكرت دعايتك .. بروح اشوفها في يو تيوب مره ثانيه :))

الظاهر من الجو .. وبعدين احنا البنات لازم مزاجيين ما يعجبنا العجب وبسرعه نعتفس .. مو شي غريب :)

انت المشكور .. اسعدني مرورك .. حياك الله :>

Fishah يقول...

طماشة

لااااا ما انصحك تقراها .. شكلك بسرعه تمل .. وماراح تستحمل عدد صفحاتها :)

6 .. 3 بنات 3 اولاد :P
مقسمتهم على كيفي لوووول

اي قلبي ابيض بس مو نفس فضه الله لا يبلانا ههههههههههه

تشكرات .. حياك الله :)

Fishah يقول...

{~المباركية~}

اي ياكره الكتب اللي جذي .. وانت تقرا ايحوشك احباط وضيقة خلق :<

ههههههههههه عاد عساها رؤية زينه :)

حياك الله :)

Fishah يقول...

رورو الشخبوطه

انا بعد ودي اشوف الفلم .. ودي اشوف اشكالهم .. لاني وانا اقرا كنت اتخيل شكل كل شخصيه .. فا .. ودي انصدم :) ههههههههههه

اي انا ام العرات لووول
بس الله الهادي ;)

بعد عمري .. انتي بعد عفويه لاحظت فيج هالشي :>

اجمعين ان شاءالله .. ونوديهم الروضه مع بعض لووول

حياج الله خيتووو :*

Fishah يقول...

اجتماعي

اي مرت علي هالروايه بس ماقريتها
مادري ليش من اسمها حسيت فيها احباط
وانا مو ناقصه .. على اطريف لوول

خلاص لا تقراها .. انا اقصها لك باختصار ههههههههههههه


اي شفت شلووون .. مو هين طلع .. كلنا جاوبنا على اسألته هههههههه
بس ترا باقي انت .. وصاحب الاسئله ;)

ههههههههههه انا على وقت عيالي .. اتوقع بيطلع شي يديد .. بيقولون لي شخباري التدوين خخخخخخ بس هم بوريهم بلوقي بس ما اوريه ابوهم لوووول

حياك الله اخوي سعد :)

Fishah يقول...

Being One*

أهليــــــــــن

من جرير .. صارلي شهر وانا اقرا فيها يالله خلصت :>

اي حده فضيحه .. مو شي والله .. امبيه عيل انتي نفسي يمكن .. واذا بجيتي بس خشمج يشب حمر @@ ههههههههه

بعد عمري تسلمين .. انتوا اللي والله دشيتوا قلبي .. واحسكم صج خواتي :)

مشكوره :*

Fishah يقول...

حافية القدمين

اي غلافها يبط الجبد .. المفروض يغيرونه .. الروايه الاجنبيه غيروه سووا غلافها نفس الفلم :<

ههههههههههههههههه زين اشوا ما يبين .. لوول اهني ماتطلع عراتي خاشتها :P

مشكوره .. حياج الله حبوبه :)

Fishah يقول...

My Books And Me

هاذي انتي ! شفت الصوره قلت يه يه يه منهو هذا اللي يايني :Pp

اممممممممم انا اقراهم عنج .. توفيرا للوقت والجهد .. اقصهم عليج بعدين واقولج شسالفتهم :)

اهنن اهنن .. حياج الله خيتوو :)

خاتون يقول...

أنا الغيشا أحس أنهم جذابات و غيورات
و مغرورات ...طيحت من حظهم...
بس لبسهم عجيب ^_^

بالنسبة لمن تكونين سعدت بمعرفتك أكثر
و لسؤال صفاتج اللي وجهتي لنا...
خيالية - مرحة - متحلطمة - رزينه
^_^Waiting 4 MorE

Fishah يقول...

خاتون

اتصدقين انا بعد احس انهم جذي .. وبعدين احس مالهم معنى .. وايد معطينهم اهميه .. بس صاجه لبسهم حلو بس ترا طبقات جنج لابسه اثقال :>

بعد عمري انا اسعد .. تسلمين :**

مشكوره .. حياج الله :))

Sweet Revenge يقول...

اعترافات الغيشا حولوها فلم اجنبي ووايد امدحوه بس للاسف ما شفته شوقتيني عليه
مبني قصة حلوة
النيو لك ابداع وايد حلو بالعافية عليج :)

أميـــــره يقول...

زيارتي الاولى وليست بالأخيرة ..

:)


ستايل مدونتك جميل ولكن ما رأيك بهذا ؟ أجده يناسبك ..

:)

http://sad-fish-template-demo.blogspot.com/

أميـــــره يقول...

اقصد بـ ( ستايل مدونتك ) .. القالب .



:)

كبرياء وردة يقول...

كنت متمنية اشوف هالفلم

مشكلتي اذا ماشوفه بوقته ماشوفه عقب :s

Butterfly Chick يقول...

9aba7 el 5air..

el reywaya shaklha interesting .. I will think about buying it.. ma3ana 3endi wayed books now at home o la7een majest wa7ed minhum :P

nice blog dear.. I really enjoyed reading your answers on Namool's questions ..

ya36eech el 3afya ^-^

رورو الشخبوطه يقول...

باج ..

http://6oood.files.wordpress.com/2009/04/picollage.jpg

شوفي هني في اكثر من غلاف لنفس القصه يمكن دار النشر..

انا حطيت لج فيديو الفيلم ببلوقي ماشفتيه؟؟

بحطه مره 2 خخ مو غصب ارويج اياه بس عساس تشوفين الشخصيات..


http://www.youtube.com/watch?v=CB67V6Tpm1c


انا اهني راكده و احاول اسوي كنترول ع نفسي واعصابي بالصج لاتشوفيني عاد اقرق ع راسج وانا ماعرفج خخ ..

وموم انا استانس لي احد قرا قصي احس حللت فلوسهم خخخ..

ومرسي..

زمان الوصل يقول...

نذبه جميلة عن الرواية ومشوقة في نفس الوقت .. أعتقد لي زيارة للمكتبة لشراء هذي الرواية ^^" ..


زيارتي الأولى لمدونتكم المميزة أمتعتني وسأعقبها بزيارات أخر ^_^ ..



الأندلسي

Cesc يقول...

شدتني الروايه بصراحه ,
بحاول اقراها ,

شكرا على اعلامنا بها ,
دمتي بود

fatto يقول...

مساء الخير فشه اشلونج شخبارج :)

ترى في منه فيلم وايد حلو انصحج انج اتشوفينه :)

Faith يقول...

أنا سمعت فيها بس ما قريت الكتاب **

شكله حلو والله يعطيج العافيه أختي

=)

GodFather يقول...

hi.....hi
fishah
ذكرتيني فيشة ايام الستينات والسبعينات ماكو كمبيوتر ولا قنوات فضائية ولاانترنت قناة وحدة في التلفزيون تفتح الساعة4 وتسكر الساعة 12 وماعندنا الاالروايات العالمية وطايحلة مثل ليتل غير وذهب مع الريح واوليفر توست والالغاز المصرية تختخ والاصدقاء الخمسة ومجلات سوبرمان المصورة وباتمان ويوم كبرنا شوية قمنا نبوق من خواتنا الكبار مجلات المصورة مثل الحلقات المدبجلة مالت الايام مثل مهند ونور بس بالمجلات كانت عندنا واساميهم ريما وفوتو ريما ودليلية وسمر اعتقد بتقولين شقاعد تتكلم من اي عصر قاعد تتكلم شايب.......هههههههههه بس كانت متعة نتبادل القصص مع الربع وكل مانزلت قصة او رواية تصير الاتصالت بتلفون الاسود بو قر ص اذا رن البيت كل يركض علشان نشيل التلفون مو علشان لايسكر علشان الصوت مزعج تقولوين جرس مدرسه وياويليه اللي يتصل في الليل طبعا عندنا قبل الليل يبدا الساعة 9 وشوفي التحلطم من البابا الله يرحمة من داق بالساعة المتاخرة اللي ماعنده سالفة شيلو التليفون ازعجنا واحنا قاعدين مجابلين التلفزيون ننطر المسلسل بعد اخبار التاسعة ونروح نخمد بجم زفة من الحجي قوموا ماوراكم مدرسة ونروح نسووي روحنا نايمين ونفتح الليت ونسهر مع الروايات الجميلة سامحيني fishah طولت بس ذكرتيني بالماضى الجميل......... عفيا عليك يا fishah كسرت القاعدة وواتمنى الكل يقرا الرويات لزيادة الحصيلة اللغوية
.............
اسئلة الاخ العزيز نمول......
ازيد على بعض صفاتك انتي تحبين الجميع وعندك ردود وتمنيات للكل من
غير مجاملة او تحديد وهذه ميزة مدونتك احس الكل يكتب او يرد بعفوية عليك ويبي يريح واقولك ياfishah مدونتك عطتنا مساحة كبيرة للتعبير
ماعتقد ان اللي عندة استعداد يشوف الرد على كتابتة يصير مزاجي بالعكس يكون من الشخصيات المرحة ويتقبل النقد والراي الاخر....
fishah مدونتك غيرت من مفهوم المدونات الشخصية و اكثرها يكون نقد او تعليقات في السياسة وهموم الحياة هذا وخري عنه لان مالنا خلق خرابيط هالايام
.........
وكل رواية تخلصينها وانتي بخير..... ولاتطولين في الموضوع القادم ******

Angel Orchid يقول...

شرحج حق محتوى الكاتب باختصار وااايد مفيد :)

حلو ان عرفنا شغلات يديدة عنج ونحبج اكثر ...

Fishah يقول...

Sweet Revenge

اي انا اعجبتني الروايه مع انها طويله .. وبشوف الفلم ان شاءالله .. بسبقج شكلي :)

الله يعافيج مشكوره .. حياج الله ياحلوة :))

Fishah يقول...

أميره

أهليــــــــن

كلج ذوق مشكـــوره .. حياج الله :))

Fishah يقول...

كبرياء وردة

من صجج؟ عيل جذي مو كل الافلام راح تشوفينها :>

يوووزي عن هالطبع مو حلوووو :))

يسلمووو على المرور الحلوو .. حياج الله :)

Fishah يقول...

Butterfly Chick

أهليـــــن صباحوووو

اي ترا نايس صدقيني .. اممممممم علميني على جم كتاب خل اسبقج واقراهم .. انا هابه الحين :)

مشكورة حبوبه كلج ذوق .. الله يعافيج .. مو تقاطعيـــن :)

Fishah يقول...

رورو الشخبوطه

أهلا أهلا :)

بعد عمري اي شفته اول ما حطيتيه وناسه شفت اشكالهم .. مشكوره :)

- شفت الغيشا النحيسه والله صج طلعت حلوه نفس الوصف :)

- شفت الغيشا اللي تعلمها (ماميها) بالشارع شلون تمشي وتغري واحد :)

- شفت شكل اللي ويهه محروق ومعجب فيها :)

- شفت اللي ساعدها يم الطوفة ( هذا اللي صج كان ودي اشوف شكله ) :)

قرقــــــــــــــــي اخذي راحتج انا احب السوالف والقرقه افا علييييج :)

اي قوليلها .. مو عاجبها ابوق منها جم كتاب :P

حياج الله خيتوو :)

Fishah يقول...

زمان الوصل

اتمنى انها تعجبك :)

اسعدني مرورك .. حياك الله .. لا تقااطعنا :)

Fishah يقول...

cesc

أهليــــن

وانا بانتظار رايك فيها :)

يسلمووو على المرور .. حياك الله

:)

Fishah يقول...

fatto

أهلا أهلا .. الحمدالله بخير :)

اي لاااااااااااااازم اشوفه .. بحاول ادوره .. اذا عندج اياه حذفيه على بيتنا جنج ماتدرين ههههههههه

حياج الله خيتوو :)

Fishah يقول...

faith

أهليـــــــن

امممممممم عيل تعالي انا معاج نشوف الفلم :>

الله يعافيج حبوبه .. يسلموو على الطله الحلوه :)

Fishah يقول...

GodFather

أهليــــن :)

لا اشدعوا .. العمر كله ان شاءالله .. بعدين لحقنا على شوية من هالسوالف .. مروا علي المجلات ام الصور .. من صجي كنت ايمعهم واتبادل مع بنت خالتي .. وهبيت في روايات عبير قاصين علينا لوول
اي تختخ ( ذكرتني في رورو هابه فيهم الحين لوول )

صح يا شين تلفزيون اول .. الله يعافي الستلايت والشوتايم الحين خخخخخخخخخ

-----------------

اي تلفون بو قرص .. ولازم الواير اشطوووله .. ذكرتني في سالفة خالتي .. تقول اذكر الواير شطوووله بالصاله بس يحوس ويانا من دار ليه دار خخخخ

الله يرحم الوالد .. شكله كان امشيكم سيييييييييييييده :>

انا الحين شاده حيلي هابه اقرا :>

-----------------------

يسلمووووو على زيادة واضافة الصفات .. كلك ذوووق مشكور .. يمكن استعيلت وحطيت هالصفه .. بس اهيا اللي بسرعه نطت في بالي .. خلاص بسحبها :)

--------------------------

اخذ راحتك .. احب السوالف لاااااا تختصر شي ههههههههههههه

بيني وبينك .. ماحب سوالف السياسه وعوار الراس .. صج اني اتحلطم .. بس تحلطمي على اشياء بسيطه .. مانبي ضيقة الخلق والقثه :(
--------------------------

وانت بخير يسلموووووووو .. ان شاءالله احاول :)

مشكووور .. حياك الله :))

Fishah يقول...

Angel Orchid

أهلا أهلا :)

زين اشوا .. عاد كنت متوهقه شلون اشرح :)

تسلمين حبوبه .. انا احبكم بعد :)

Butterfly Chick يقول...

if you like reading english books, try reading Mercy or My sister's keeper for Jodi Picoult..

oo banat el reyath egoloon 7elo.. qadeem i guess.. shareeta bas still magareeta:P

Fishah يقول...

Butterfly Chick

حساااااااااااافه عاد توني يايه من جرير :<

ان شاءالله المره اليايه :)

انا بعد عندي بنات الرياض من زماااااان بس ماقريته .. شفت جم صفحه علطاير بس ما كملته :)

مشكوره حبوبه :)

رورو الشخبوطه يقول...

باج للمره الاخيره :)

العفو والله يحيج يارب..

بس سوال منو رورو اللي تقرا تختخ الحين ليكون انا خخخ..

اذا اي لا انا اقرا رفعت اهو بطل ماوراء الطبيعه ..

تختخ كنت اقراه قبل 7 سنين تقريبا لما كنت بالثانوي واهو من ابطال المغامرين ال5..

وبس اوضح اللقط..

عاد حلاته اطلع مو انا خخخخ يانه بيطيح ويهي وبعلق << ماتوب بس لابسه بوشيه اكون متنكره..

Fishah يقول...

هلا رورو

اممممممممم امبله عنج :)

انا عرفت تختخ منج .. مره يبتي طاريه .. بس ما اذكر في اي بوست او تعليق :<

بس اذكر اني قريته عندج :)))

صح؟ @@

ههههههههههههههههههه

قولي اي :)))) ههههههههه

الحين انا اللي بلبس بوشيه لوووول

رورو الشخبوطه يقول...

اهلين..

خخ لا ..

اقصد لا تلبسين بوشيه..

صح كتبت عنه مرتين مره عدد فانتازيا ومره اقدم عن ذكريات بالقراءه ..

bent el deera يقول...

يااااا حلوج يا فشوووش ويا حلو بوستاتج

الكتاب عندي اياه مقطوط من ذخر مادري متى بقراه

اجاباتج على الاسئله حلوه وتونس :>

واخيرا


ولهنا عليج وييييينج؟؟؟

Fishah يقول...

رورو الشخبوطه

اشوا ذاكرتي ليلحينها اوكي الحمدالله

:)

Fishah يقول...

bent el deera

أهليـــــــــــــــــــــــــــــن

هلا وغلا :>

عاش من شافج ;)

عيل انا سبقتج وقريته وافتكيت لوول

مرورج الاحلى يالغاليه .. تسلمين

حياج الله :*

ميمة السبيت يقول...

** اخيراً فتح التعليق مادري شفيه علي :(

- القصه هذي سووها فلم نزلووه جم يوم تالي وقفوه مادري ليش مع انه مافيه شي انا رحتله و وايد عجبني و كان وايد طويل بس حلو ..

ولهت عليج وايد يا فشووووش

Eden يقول...

انا ماقريت الكتاب بس حبيت الفيلم بس هم الفيلم قوي

Fishah يقول...

ميمة السبيت

أهلا أهلا :>

اي كان المربع معاندج خخخخخخخخخ :P

حسااافه انا ماشفته

بس شفت اللي دزته لي رورو :))

انا بعد :>

يسلموووو على هالطله الحلوه :*

Fishah يقول...

Eden

شوقتوني على الفلم .. شكلي بطلبه :>

يسلموو على المرور الحلوو .. لاتقاطعين :)

Fantaseyah يقول...

يااا حليلج ياا فشونه والله وقمتي تقرين :)

انا شفت الفيلم بس اكيد الكتاب في تفاصيل اكثر ويمكن قرايته تونس ...

يلا ناطره تخلصين الكتاب الثاني وتعلقين عليه

يعطيج العافيه

aL-NooR . يقول...

فقدج ..

Fishah يقول...

Fantaseyah

أهنن أهنن :>

اي شفتي شلوووون .. اول مره اكمل شي لووول

اييييييه شفته اخيرا وانصدمت :<

لا عاد هالكتاب شكلي ماراح اكمله .. كل من سبقني وقراه .. بس خلاااااص مابي :<

الله يعافيج حبوبتي :*

Fishah يقول...

aL-NooR

أهليــــــــن :)

بعد عمري .. يارب ماتفقدين غالي :**

ببشرج بصير من ربع البلاك بيري .. طريتي علي اول ماقررت هالقرار هههههههههه

غير معرف يقول...

قريت اجوبتج بسراحه اول مره ادش مدونتج بس بالفعل حسيت انج نفس الكلام اللي قلتيه عن نفسج ويمكن اشوف شبه مني انا برجي الدلو الدلو بس انا مع الأطفال تغيرت شوي ...للأحس الله يوفقج