الأحد، سبتمبر 27، 2009

تناتيــف(2)

بمناسبة بدء الدوامات وقعدة الصبح اللي اهيا شر لا بد منه
ليما الله يكتب علينا التقاعد ( بعد قرن من الآن ) :P
مو المفروض يسوون لنا مهرجان العودة الى الدوامات
اسوة بمهرجان اخوانا الطلبه واخواتنا الطالبات
( مهرجان العوده الى المدارس )
ويعرضون فيه ماجلة المكتب بسعر رمزي :P
=============================
وانا بطريج الدوام
شفت سيارة من الحجم الكبير العائلي
بس لفت نظري
ان صاحبة السيارة معلقة ( عقال ) بالمنظره جدامها
وهاذي ثاني وحده اشوفها مسوية جذي
تساؤلي يقووووول : هالحركه لها معنى ؟
او ان ربما يكون زوجها ناسيه من امس ؟
=============================
الى متى ( الايجو )
يا اصحاب خدمة الايجو
ينجلني ويفصل من الصبح ليما هالوقت ما يشبك
واضطر اني اشبك كالعاده من وايرلس بيتنا
انتوا عيل ليش ذابحه عمري عليكم وادفع كل شهر؟
مع العلم ترا انا خوش عميله لاتخسروني
ترا متهدده اهدكم ديروا بالكم :P
============================
مادري ليش من اقرا احد ياييب طاري السينما
تطري علي سينما السالميه .. تذكرونها ؟
اتهقون ليش هدموها . وليلحين ما بنوا مكانها شي؟
عندي كانت احلى من اني ادش مجمع وامشي في الزحمه وحالتي حاله بس عشان السينما
كانت مبنى بروحها شحليلها مالها شغل في احد :P
=========================
قناة الوطن هابه تحط مباريات ابيضxاسود
ليش ؟ يذكرونا بماضي وامجاد لاعبينا مقارنة في مستواهم هالوقت ؟
=========================
وختاما
اقولكم
ناموا مبجر .. باجر وراكم دوام
:(

هناك 44 تعليقًا:

كاريكاتير يقول...

على طاري سينما السالمية

سنة من السنين حطو فيها فيلم التايتنك

طبعا انا وصاحبي شفناه اذا مو عشر مرات ستين مرة..!!باختصار الفيلم تقطع بالفيديو اللي دخن وطلع لسانه..

المراد

الفيلم تنتف بالفيلم والسبه الرقابة، واحنا قاعدين ولا اللقطة المؤثرة وفاة بطل الفيلم جاك، الناس تبجي والبنات دموعهم اربع اربع..جان اشوف ولا صاحبي يبجي من صجه مثل الياهل شفيك شفيك

جان يقولي انا صار لي سنتين اداوم كل يوم بالحلاق اسوي شعري واضبطه ما شفت بنت تعبرني وهذا جاك مات من البرد بعرض البحر بجو عليه بنات العالم صج قهر!!

Faith يقول...

لوووول أي والله صاجه
الله يسهل علينا بس ..ننطر الويك أند مناطر ..
لا والشمس والحر..الله المستعان ..

متى ايييي الشتا بس !!

ويعطيج العافية :**

*Being One يقول...

لا على قولة طارق العلي يسمونه مهرجاااان العودة الى المدارس جنه الطالب الحين بموت بداوم تكفه بداوم ميت يبي المدارس
على سالفة العقال اخاف بعد هذي هبة بدال شوارفسكي النجمه اللي كانو يحطونها عاد تخيلي كل واحد يمشي و معلق عقال جدامه
تصدقين و الله ايااام سينما السالميه كانت حلوة و صج يعني طالعةرايحه سينما تحسين سينما و بعدين تخف الزحمه عالمجمعات
شكررا فشووووو ^^

..pen seldom يقول...

مســاء الخير ..

ان صاحبة السيارة معلقة ( عقال ) بالمنظره جدامها
وهاذي ثاني وحده اشوفها مسوية جذي
تساؤلي يقووووول : هالحركه لها معنى ؟


بصرآآحة أثرتي فضوولي .. !!

ياليت إذا عرفتي تقولين لي

:)



والله يعينك من خدمتهم السيئة ..

وأيــضاً .. دواام موفق

:)

أنا ماراح أبدأ دوام إلا الأسبوع الجاي

:P

تحياتي لكِ ..

شاي الضحى يقول...

الي معلقين العقال يمكن ماخذين سيايير رياييلهم وانتي شفتيهم ما دروا يتكتبين عنهم جان شالوه لوووووول

سينما السالميه احس كانت صج سينما كبيره وبروحها وكانوا يعرضون فيها مسرحيات بس ما كنت احبها


مشكوره :)

Angel Orchid يقول...

شلونج فشه:)
يا حلات الردة حق البلوقرز والاحلى الردة حق بلوقج وبوستاتج الي تونس وتفتح النفس:*

انا كنت معلقة عقال ذاك اليوم !!! p;
اتغشمر.. الظاهر هبة يديدة ولا اذا على قولتج سيارتها كبيرة يمكن ماتبي تبين انها سيارتها مفتشله حطت العقال عشان يقولون هذي سيارة ريلها :)

والله صاجة ياحلو سينما السالمية كنت احب جهاز العرض العود القديم الي حاطينه عند الباب :))))

وسالفة قناة الوطن مو بس مبارات حتى برامجهم ومسلسلاتهم كلها قديمة سكوو على تلفزيون الكويت ...
مشكوورة حياتي ولا تقطعين الله يخليج :*

طماشة يقول...

لول عاد انا اليوم شفت جمس فيه وحدة وكانت معلقة بالمنظرة عقال خخخ.. والله يعينكم على الدوامات انا راح أداوم 4/10

طماشة يقول...

بالنسبة للإيجو نفس الحالة هالجم يوم وايد يفصل ويقطع منرفزني الظاهر كلنا جذي! انا زين انتي وطنية ولا زين؟

عاد امس شفت وحدة تسوق جمس ومعلقة ع المنظرة عقال لول


ثانكس ع التوبك


طماشة

Fishah يقول...

كاريكاتير

حتى انا من اللي بجوا وذبحوا عمرهم بجي لما مات .. حتى خلص الكلينكس بجنطتي جان آخذ من اللي قاعده يمي لووول

مسكين صاحبك تعقد هههههههههههه

اسعدني مرورك اخوي .. حياك الله

:)

Fishah يقول...

Faith

واااي استغفر الله ماحب الشتا

وكنت احب الصيف حق البحر الحين ماااكو بحر طاح في جبودنا :<

الله يعافيج حبوبه .. تسلمين

:)

Fishah يقول...

Being One*

ههههههههههههههههه اي اذكر هالمشهد في مسرحيته

لووووووووووول اي والله بدال النجمه يبتيها :>

اي كانت صج روووحة سينما لما اروح لها .. مو الحين .. ما يبقى احد مايشوفج يم المحلات والمطاعم واللويه .. ويالله تدشين السينما :<

اهلا اهلا .. حياج الله :))

Fishah يقول...

pen seldom..

أهليـــــــن

اتصدقين محد جاوبني على هالتساؤل :<
بس ماعليج لاااااازم اعرف شنو معناته واقولج :)

اي باطين جبدي .. لا والحين شايلين صفحة الكشف اللي انا طول هالاشهر شكثر دافعه لووول

اجمعين ان شاءالله حبوبه .. حياج الله

:)

Fishah يقول...

شاي الضحى

هههههههههههههههه اي ناقصني بس اصورهم :P

بالعكس عيل انا كنت احب اروح لها :)

حياج الله شوشو

:)

Fishah يقول...

Angel Orchid

أهليــــــــــــــــــــــــــن

أهلا أهلا .. حيالله المختفيه شلووووونج :))

بعد عمري تسلمين .. وجودج الاحلى حبوبه :))

اي الظاهر متنكرين مايبون يبينون انها سيارتهم هالبليه .. او ان قصدهم ترا ورانا رياييل لحد يتحرش لوووول

ايييييييييييييي اذكره :)

اي مادري شفيهم الوطن اختربوا .. الظاهر طلعوا كل اللي عندهم برمضان والعيد :P

حياج الله .. انتي بعد لا تقطعين ;)

Fishah يقول...

طماشة

شفت @@
انا اقول هالحركه لها معنى :P

وناسه بترتاح اسبوع زياده خخخخخخ

انا بعد (زين) .. الظاهر قاعدين يهدمون ابراجهم خخخخخخ

موفق اخوي شد حيلك ولاتنسا تلبس كمامه :>

حياك الله :)

نمووول يقول...

الله يعينكم عالدوامات ويسهل عليكم
هههههههههه خوش فكرة مهرجان العودة للدوامات

العقال معناته (تلف علي السبك فيه)

لعن الله الايقو
ما خلا احد بحاله يا موقفينه
يا زايدين السرعة يا مقللين الليمت
يا ما يشبك

يمدحون الوطنية

شكراً ..

اجتماعي يقول...

الفال لنا تبدي دواماتنا ..
===
يمكن موضة يديدة ..
البنات لبسوا غترة قبل فترة ..
والحين عقال :)
===
الكويت صارت كلها وايرلس بكل مكان
شتبين بالايجو

مصاريف زايدة :d
===
سينما السالمية كانت عجيبة ..
كل السينمات كانت دينارين ونص ..
بس اهي دينار ونص ..

الله يذكرها بالخير
===
خلينا نستانس بمباريات قبل
احسن من فضايح الحين ..

رورو الشخبوطه يقول...

السلام..

ويع الدوام اول يوم متاخره نص ساعه ويالي احساس اني بروح المدرسه اول يوم واحاتي يحطوني باي صف !!

والعقال الظاهر ريلها او ابوها حاطه يذكرها لي تاخرتي بتعرفين شبيصير فيج خخخ >> تهديد ..

انا توني اشترك بالوطنيه وللحين زين << اقصد منيح اشوه ..

انا ماعمري رحت سينما جذي كله بمجمعات وكان ودي اروح سينما السيارات :)

والمبارايات ع قولتهم العصر الذهبي :)


مشكوره فش فش..

{~المباركية~} يقول...

الله يسلمج هالعفال علامة المنتج الكويتي

مادري ليش دوامات الكويت تضيق الخلق انا ودي مكتب جذي يطل على الجبال و بالنص في بحيره وتحت حديقه و ساعات الغيم ينزل لوول احلام احلام

الايجوو طووووووووووط بعيد عنه

عاد توني قاعد اكلم ربعي اقولهم اني بروح سينما
بس ارجع من السينما اعطيج خبر

قناة الوطن قاعد تحبط الديره فقط لاغير

Hope يقول...

اي والله صاجه
الله يعينا على الدوامات

...
حلفي معلقه عقال ؟؟ شالسالفه
اول مره اسمع بهالشي .. باجر يهبون فيه و يصير موضه

و الايقو خلج منه و هديه احسن
انا لوعو جبدي و خلاص هديته .. اول السنه شزينه بعدين قام يخوره ، صار بطيء وايد و بعدين قبل لا يخلص اشتراكي يدزون لي مسج دفعي 187 K.D
و لما ادق ولا اكتشف مجددين لي من كيفهم .. خدمتهم كلش مو شي .. يبطون الجبد
=@

princess adadi يقول...

لوووووول اهم شي المهرجان :P
اتفقي مع اللي معاج بالدوام وسووا

حركة العقال يجوز تكون هبة يديدة
خو عادي نتقبل كل الهبات بالكويت :P

نصيحتي خلج عالوايرلس في بيتكم ابرك
شخصيا ما استعمل الايجو بس وايد سمعت عن مشاكله

عمري ما طبيت سينما السالمية
بس جنه خبري هدموها عشان بيسوون مجمع سينمات

اييي بالضبط
ابوي كل ما يشو مباريات ابيض واسود يقول الللللله هذا اللعب

بالنسبة لي دوامي ما بدى
وتوها سهرتي بدت
^^
يعطيج العافية

حَافِـيَةُ الَقَدمَيّـنْ ولِبَاسِي المَطـرْ يقول...

اعرف واحد كلا يعلق عقاله @@
تعبت وانا ادور السبب
اللي يعرف خيقولنا
لعل وعسى يروي فضولنا p;

GodFather يقول...

hi...hi
fishah
ماني عارف شيصير لو الدوام يبداء الساعة 9الصبح اشدعوه عندنا مصانع علشان من الصبح نقعد تدرين عاد قاعد افكر اتقاعد لاتزعلين قاعد احمصك لان مابقي جم شهر واتقاعد بس ملينا العصابة نصهم متقاعدين ومتكودين بكوسته واستاربوكس بس ناطرينيني راح تصير الكفيات حق الشياب الصبح والشباب في الليل .....
*************
سالفة العقال انا اقولك السر الاخت ماخذة العقال علشان تضمن مانتطق فيه..........
*************
الايقو يفصل عاد انا ناوي اشترك علشان السرعة الظاهر بهون عنه واضل على الواير ليس احسن.....
***********
احسن سينما كانت وشيلتهم لها غلط نتمنى مثل ماقلتي يسون سينما منفصله عن مجمع تجاري.........

reemas يقول...

و انتي ليش سهرانه ؟ :)))
****
والله العوده للمدارس صار لنا احنا
احنا اللي نتشرى و احنا اللي نلف و احنا اللي تصير عندنا لويه
و نقعد مبجر نوصل و نييب
صرت اكره شهر ٩
****
بالنسبه للعقال الظاهر تقول هذا عقال زوجي وخرو عني ههههه
****
خبرج عتيج... فيه مبنى الحين قايم ماله طعم و لا لون بنوه مكان سينما السالميه
اللي متحسف عليها سينما الاندلس
اللي شهدت تاريخ ثقافي كبير
غنوا فيها ام كلثوم و فريد الاطرش و عبدالحليم و ناظم الغزالي
و تذكرون عايلة مجدلي ؟
انا حضرت فيها عرض فرقة البولشوي الروسيه للباليه
وين راح كل هذا
في دول ثانيه هذي تصير متحف او يسوون دار ابورا مكانها
مو مسوين مكانها مجمع مليق
****
توني متكلم عن زين و سوياهم
قطي الايجو ولا تحسفين
شركه مو محترمه و خدمه صفر
*****

تحياتي فيشا
:)

Fishah يقول...

نمووول

أهليــــــــــين

اي ترا عندي خوش افكار واقتراحات ههههههههههه

اي والله صااااج الظاهر هذا القصد من تعليق هالعقال :)

وانت الصاج يمدحون فيفا

اسعدني مرورك .. حياك الله

:)

Fishah يقول...

اجتماعي

واي اشتبي بالدوام .. استانس بالعطله والبطاله :)
=========

اي والله يمكن .. كل شي جايز .. ناس فاضيه

=========

جبرني الوقت ( حلوه الاغنيه ترا ) .. حق الدوام اذا فضيت اشبك :<

=========

اي كانت صج سينما :<

=========

اييييييييييه بس ابيض باسود اتضيق الخلق :<

يسلموو اخوي على المرور .. حياك الله

:)

Fishah يقول...

رورو الشخبوطه

اصلا انا اول يوم دوام ماااانمت :<

هههههههههههههههههههههههههه رورو ضحكتيني صج صج على هالتفسير .. صاجه يمكن تهديد .. عشان يكون على طول جدام عيونها :))

انا يمكن اجرب الفيفا

الله انا بعد كان ودي اشوف مالت السيارات :))

انزين مو شي ابيض باسود .. خل يلونونهم نفس افلام اول :<

اهلا اهلا .. حياج الله :))

Fishah يقول...

{~المباركية~}

ههههههههههه اي الظاهر جذي .. انا اذا تزوجت بعلق قحفية زوجي خخخخخخ

اممممممممممم هاذي احلام اليقظة .. جنك انا .. اقول حق البنات بييب صورة طبيعة ونعلق حواليها ستاره جنه هاذي دريشتنا :P
بس ماااكو .. ما الك الا مكان مجوووولح :<

اي بصبر عليهم بس هالشهر شكلي

خلاص ننطر .. سو لنا تقرير عن طلعتك وشنو الفلم :))

اي والله يمكن بس ذبحووونا ابيض واسود :<

اسعدني مرورك .. حياج الله

:)

جبريت(عنيف سابقاً) يقول...

والله انا انام الساعه 1 ولا ثنتين اقوم نشيط شحلاتي حق الدوام الساعه 7 الصبح اسبح واروح لهم اوصل قبل الدوام بدقيقتين اطق كرتي الالكتروني الي يحسب دخولي من اول ما ادش المسافط والكامرات تحسب السيايير والي يدخلون وما يدخلون يعني مصيود مصيود

لكن الدوام جميل دام الوجه الحسن وراي قاعده لووول شنو ابي اكثر الماء والخضره والوجه الحسن قاعده بالمكتب الي وراي وانا عزوبي طرق المعاش لوول

Fishah يقول...

Hope

وبعد في وحده معلقه مسباح .. مو جني قاعده لهم قعده لول

اي والله قاهرني .. كله يفصل او يكون شابك بس ما يبطل شي :<

يسلمووو على المرور خيتووو .. حياج الله :)

Fishah يقول...

princess adadi

اي شكلنا بنسوي جذي عن خاطرنا :)

مااااانبي مجمعات بسناااا مجمعات .. بسنااا ( تذكرت سعد الفرج في درب الزلق " بسنا فلوس يا حسين " ) :P

اي حريني اكثر بدوامج :< هههههههههههه

موفقه ان شاءالله خيتووو .. شدي حيلج واختاري تخصص سنع ماااا وصيييج :))

حياج الله ..

Fishah يقول...

حافية القدمين

أهـــــلا أهـــــــلا :)

اي والله .. صوتـــج وصـــل هههههههههه

:P

حياج الله حبوبه :)

Fishah يقول...

GodFather

اي اقهرني اكثر ههههههههههه
لا عليك بالعافيه .. انتم السابقون ونحن اللاحقوون .. بس هم بحتر خخخخخخخخخ

هههههههههه الظاهر جذي .. او اهيا اللي تطق فيه :P

والله الايقو زين وشين .. انا اكثر شي استخدمه بالدوام .. بس اذا جربت شركه ثانيه .. قول لنا رايك خل نقلدك :)

اي حلاته السينما بروحها .. الواحد يحس صج رايح سينما .. انا اطاااااااااالب بفصل السينما عن المجمعات :P

اسعدني مرورك .. حياك الله

:)

Fishah يقول...

reemas

هههههههههه طحت علي؟ عاد تدري اني ما نمت الى بال 4 :P
انصح وماطبق النصيحه :)

الله يعينكم على مشاوير المدارس وروحة الدوامات .. الزحمه زايده هاليومين :<

اي الظاهر عشان يخافون منها الاوادم مايقربون صوبها :>

اي اليوم شفت المبنى القثيث للاسف .. مادري عنهم كل شي هدموووه
اذا يوم البحار شكله اول صج تراثي والحين حده يلوع الجبد .. غير الاسواق القديمه .. وعلى قولتك السينما القديمه المفروض يسوونها مسرح اوبرا .. او على الاقل مسرح حق الحفلات بدال حفلات فبراير بس مستانسين يذوبون الثلج كل ساعه ويردونه

اي الظاهر ماراح اكمل معاهم .. بطلقهم بال3 :(

أهلا أهلا .. حياك الله .. ولاتقاطع

:)

Fishah يقول...

جبريت

اي مدام عندك (حافز) اكيد بتداوم مبجر وبنشاط :P

هههههههههه الله لا يغير عليك هالمناظر الحلوه :)

حياك الله

:)

star يقول...

fishah

لا يسمعونج صاحبات المعارض والكوبي ملوتهم الي في محلات الكلف و يسون لنا هبه يديده عقال سوارفسكي يبرق يكسر عيونا بدال نجمه سوارفسكي كل شي جايز وانا اختج .. واااي تذكرين هاذي السينما الداثرة متحف مو سينما أهي والسينمات الباجية الدايخة الي من طقتها وااي ما أبي اتذكر حرام عليج

bashart يقول...

واكككك
احب جذي !!
البوستات الي فيها فقرات و طراطيش كلام جنج قاعدة تسولفين ويانا ! خخخ
اية عليج
انة بعد عقب باجر وراي دوام
بس مستانسة و قلقة و مشاعر وايد لانه اول يوم في الجامعة خخخخ

خاتون يقول...

إذا تبين ماجلة مكتب بأسعار حلوة
ما عليج إلا أنج تروحين مكاتب شرق على كيف كيفج و تلاقين بعد أشياء عجيبة فوق البيعة *_^
أهو بس عقل في بعد اللي يحطون خوذ بنهاية الجيب و تقول خوذة ريلي يا أخي خل يقطها بسيارته أنا أظن يترززون لوووول
الايجو ...خليج على الوطنية أحسن شي بس احيانا يعلق لكن أهو أفضل ما في السوق^_^
تهقين نقدر ننام بهالمناسبات ما أظن احد يقدر ينام لأنه الكل باله مشغول أتوقع النوم يصير إنهيار عصبي لمن الجسم يتعب و يتحول لغيبوبة و يضطرون يفلعونا علشان نقوم لووووووول
قواج الله خوش بوستات و الستايل بعد حده أسطوري عجيب ..بس مكن اعرف معنى Fishah
أهو دلع سمجة و إلا يتهيء لي ؟؟!
و عام دوامي سعيد ^_^

Fishah يقول...

star

ههههههههههههه ضحكتيني على سالفة العقال الشوارفسكي .. عاد يكسر العين عدل :)

حرااااااااااام عليييييييييييييج كنت احب هالسينما الداثره الاثريه .. والله كان ونااااسه :<

حياج الله خيتوووو :)

Fishah يقول...

bashart

موفقه يا رب .. عاد شدي حيلج وبيضي الويه .. مو تفشلييييييييييينه في اول اسبوع .. ناطرين سوالفج عن الجامعه :)

اي احب اسوووولف واقرق واتحلطم :>

حياج الله خيتوو في زيارتج الاولى .. واتمنى انج ما تقاطعين :)

Fishah يقول...

خاتون

لووووووووووول امبيه خووووذه؟؟؟ مامروا علي اشوا .. شفيهم هالبنات مو مصدقين !!! الحمدالله والشكر

اممممممممم الوطنيه ما فكرت فيهم .. خاطري اجرب فيفا وبشووف شلون خدمتهم

الله يسلمج مثل ما قلتي .. دلع سمجه :)

مشكوره على المرور الحلووو .. حياج الله ولاتقاطعين :))

ntfa يقول...

ماشاء الله عليج

اتونس مدونتج .. وسوالفج حلوه !!

وحبيت شخصيتج !!

يعطيج العافيه !!

وعساج عالقوه !

Fishah يقول...

ntfa

أهليـــــــن

الله يعافيج .. تسلمين :)

مرورج الاحلى حبوبه .. حياج الله

ولاتقاطعيـــــــــن :))

Fantaseyah يقول...

ايييي والله خوش فكرة جان اثثنا مكتبنا


اهم شي العقال الظاهر راحت موضة ليفة بدي شووب لوول

الايجووو صاااير حده زفت انا تعبت نفسيا منه مادري لي متى مبهذلينا والي باط جبدي بنفسي اني كل شهر قاعدة ادفع وملتزمة المفروض نروح نتحلطم عندهم ونطلع فضايحهم


اييي كانت تونس السينما تحسفت عليها اهي وسينما السيارات


يسلمووو :*