حبيت اسولف :)

هاذي صورة وحده من اللقيمات الفاشله اللي جربت اسويهم في رمضان

بس ما ضبطت معاي

مو جنها سمجة ؟ :)

==================================

امي وعشان وضعها الحالي تحتاج سيارة اسعاف حق مراجعاتها ومواعيدها بالمستشفى

بقولكم موقفين مع الاسعاف مريت فيهم ضحكوني

عاد مادري بتضحكون او لأ

:)

الموقف الاول :

الاسعاف كانت لاحقتنا

لما وصلنا البيت

شبيت للسياره فلاشر ان هذا بيتنا

وابوي كان واقف برا

انا كملت سيده وطلعت من الفريج لان ماعندي باركينج .. قلت اخذ فره بالقطعه على ماتحرك ويفضي المكان

وخذتنا السوالف انا واختي ومندمجه حدي

رن موبايلي

والا ابوي

" انتو وينكم؟ " " قلت له قريبين ليش في شي؟؟" " لا بس الاسعاف ترا لا حقتكم ليلحين"

اطالع بالمنظره والاا صج سياره ضخمه وراي لوووووووول

نسيت عمري ونزلت

اقول حق السايق " هاو انت ليش لاحقني؟ "

يقول مادري شفتج مشيتي مشيت وراج

لوووووول

الموقف الثاني :

مره من المرات

امي بنييبها من المستشفى

وكان الوقت تقريبا 9 بالليل

واحنا رادين انا واختي بالسياره

الاسعاف تمشي ورانا

مابيني وبين الاسعاف الا سياره وحده

صعدت يمين ( مخرج يم الجسر )

وانا اصعد اطالع الاسعاف بالمنظره والا مستنه مكمله سيده تحت الجسر

انزين انا فوق !

لووول كسرت رقبتي بطالع قلت يمكن المنظره غلطانه

اقول حق اختي

" امبييييييييييييييييه " " امي " !

قالت لي " شفتها بس منصدمه ما تحجيت "

لووووول

احلى شي واحنا نطالع الاسعاف طايره واحنا مو قادرين نوصل لها :P

كان موقف يضحك لان صارت مطارده بعدين

:)

=======================

بقولكم نكته شويه مليقه توها واصلتلي

يقولكم في عيوز

راحت الدكان وقالت " عندك فكس لعوار الريول ؟ "

قال " شنو يا حلوه ؟ "

قالت " اقول عندك ككاو تويكس "

خخخخخخخ

=======================

لا تحذفون بلوقي بطماط اليوم

ماعندي شي اكتبه

بس حبيت اسولف

:)

عيـــــدكم مبــــــارك

" تقبــل الله طاعتكــــــــم "

" وعســاكــــــم مـن عواده "

:)

حلو الطبقات الثلاث :)

توني سويت هالحلو .. وايــــــــــــــــــــــــــــــــــــد لذيــــــــــــــــــــذ وسهــــــل

شفته في ايميل قبل جم اسبوع .. طلع صج يمي يمي :>

المقاديـــــــــــر :
- بسكوت دايجستيف الصغير
- حليب صغير ( بس حق تغميس البسكوت )
- 1 ظرف دريم ويب
-10 جبن كيري
-3 ملاعق طعام سكر ناعم
-2 قيمر كبير \ 1 صغير حق التوفي
- 6 ككاو مارس

الطريقـــــــــــــة :

1) نغمس البسكوت في الحليب شويه .. ونكسره في الصحون الصغيره مثل الصوره .

2) نصب عليه شوية توفي ( انا ماعندي جاهز .. سويت التوفي استكانة ونص سكر + 1قيمر الصغير)

3) بالخلاط : 1 دريم ويب + 10 جبن كيري + السكر البودر + 1 قيمر .. وبعدين نخليه الطبقه الثانيه فوق البسكوت والتوفي .
4) الطبقة الأخيرة : نذوب 6 ككاو مارس + 1 قيمر بحمام مائي .

5) اخر شي نزينه بككاو فليك مبشور او يوز او اي شي تحبونه وبعدين بالثلاجه :)

وبالعافيه

:)

ما هازا يا هازا ؟ :P

اليوم وانا طالعه شفت هالشكل الجميل :P

سؤال اليوم

وين هالدائره الحلوه يا شطار يا حلوين؟

:)

الجائزة : صحن لقيمات وجيس قرقيعان

:)

==========================

تحديــــــــــث

الحـــل : هالدائرة الله يسلمكم

يم مركز دسمان لابحاث وعلاج امراض السكر

مقابل سوق شرق

واللي يشوفها رجاءا يقولي

ليش حاطينها لوووول

ومشكورين وايد على المشاركه

:))

عشرة اشياء ..

بالاشارة الى سؤال الاخ العزيز نمووول ( اسلوب وحده تكتب كتب رسميه )

" اكتب عشرة اشياء تعرفها عن نفسك "

نفيدكم .. ( ههههههه بس عاد )

باختصار هذا اللي طرا على بالي

:)

1- احب الهدوء والانطوائية

2- خدومة وماحب ارد احد

3- ملتزمه ، نظاميه

4- عصبيه بدرجه جبريت اذا وصلت حدي (مو لاايق علي ترا)

5- متردده وايد ( مو بسرعه اتخذ قراراتي )

6- قلبي ابيض بسرعه انسى

7- وتناقضا للصفه اللي قبلها .. بسرعه اكره اذا خذيت موقف من احد

8- حساسه وايد وايد

9- نسااااااااااااايه بصوره مو طبيعيه

10- حنااانه نوعا ما ( على المزاج )

اشكرك اخوي نمووول على تمرير السؤال

وبدوري امرر السؤال حق :

رورو الشخبوطة

ميمة السبيت

Fantaseyah

Angel Orchid

Being one*

:)

====================================

اخيرا دشيت المطبخ :P

=========================================

يبط جبدي مسج

"احمال الكهرباء مرتفعه في منطقتكم ساهم في خفض

الاستهلاك "

احسه واحد نايم في دوامه وتوا قعد من النوم

وتذكر يدز هالمسج قام ورعص دقمه

ودزه حق كل الكويت :P

مبــارك عليكــم الشهــر :)

كــــــل عــــــــام وانتـوا بخيـــــــــر

ومبـــارك عليكــــم الشهـــــر

عســى الله يعوده عليكــــم بالصحــه والسلامـــه



:)

راح فيها المريض

راح فيها المريض

الصراحه كسر خاطري :P

الله لا يبلانا