امس (تو الليل) تطرقوا حق موضوع جرائم الخدامات

سوالفهم الصراحه تخرع .. مايخافون ربهم .. افعال ماتطري على البال .. خريجين سجون ومرضى نفسيين

يعني الحين بنعيش مرحلة اللي الخدامه تزفنا مو احنا اللي نزفها من الخوف :(

حسبي الله عليهم .. الصراحه هذيله صرنا مانقدر نعيش معاهم ولا نقدر نعيش بدونهم

وعلى طاري الخدامه

تطري علي bent el deera

امنيتها تبي خدامه نظيفه وامينه وتفهم .. الصراحه عقب اللي شفته امس .. امنيتج شكلها بتطول :)

فلم السهرة watchmen

فلم قصته الاساسيه عن ابطال خارقين .. والواحد المفروض يشوف شي اكشن وحركات .. بس هني الابطال بس ضايعين مايدرون شيسوون .. التناحه زايده .. كلام وايد ( بس بابا لا يسوي قرقر واااازد ) p:

وبعدين كل بطل اتفه من الثاني .. اول شي جون .. عالم الطاقه اللي صارت عنده قوى عقب ما انحكر بالمفاعل النووي .. وصار شي عجيييييييب :) بس الله يهداه بطل وحالته حاله بس مو ساتر نفسه خخخخخ اييييه البس تريننج p: ودمه حده ثقيل ويالله يتحجى .

وحبيبته اللي مره تصير حبيبته ومره تصير حبيبه دان ( شبيه باتمان ) وكله ينطق p:

وواحد بس لابس دلاغ على ويهه مااااااااااااعنده سالفه بالمره

اممممممممم المهم .. هالفلم من النوع اللي الواحد لما يتابعه .. وده يشوف وبعدين شنو اخرتها معاهم .. ولما يخلص .. تحوشه حاله عقده الذنب .. " انا من صجي كملته للآخر" ؟ !

بس خلاص .. حبيت اتحلطم :(

اقتراح p:

امس من ضيقة الخلق ياتني افكار ابداعيه p:

كل شي طرا علي ,, اخر افكاري ،، ليش ما يسوون عندنا حديقه كبيره نفس الهايدبارك ،، يزرعون فيها كل انواع الشجر ( صج انه بيجولح شويه بس ميخالف ) ،، وثيل ،، وبحيره صناعيه .. وكراسي .. وممشى .. وبط بس شويه ذرب .. ووز .. وسناااجب ( كنت احب اوكلهم بسكوت خخخ ) يعني باختصار هايدبارك مستنسخه هني بمعاييرنا .. ويخلونها في بر مشرف عشان ماتكون بعيده ( انانيه ) .. الواحد محتاج جذي اماكن تفتح النفس وكلها خضار وورد :(

بسسسسسسسس خلااااااااااااااااااااااااااص !!

اليوم انا بتحلطم

( خل اتربع ) .. بسسسسسسسسس خلااااااااااااااااص .. شنو هذا !! انا انكرفت يا جدعان ههههههههههه

لا صج .. هالاسبوع اول مره اشتغل هالكثر .. حسيت صج اني محلله معاشي هههههه .. اول مره ما افضي جذي ( وحده مو مصدقه ) .. تذكرت ايام دوامي بالبنك .. كانت ايام بائسه .. تعب .. استعباد .. والقهر .. اني تحلمت فيهم اليوم الصبح .. حلمت ان مديري مناديني (نفسه ماتغير) يقولي وقعي على ورقة استقالتج لول واتصفح واقرا الورقه عشان اوقعها .. والا فيها دعاية مسابقة في دبي .. ودعايه محل تصوير يهال .. شكو :<

واني مطلوبه 250 دينار .. شفيييييييييه عقلي البااااطن .. ايييييييييييي حلمي حلم سنع ..

الله كريم ..

المهم .. وكعادة كل خميس .. استانس ان بدا الويك اند اخيرا .. :)

عفيه خلق ..

اليوم وانا بطريج الدوام .. لاحظت سيارات تعليم القياده شكثرهم .. شدعوا من ال 7 ونص تعليم؟؟ من له خلق يتعلم هالحزه .. الواحد يالله يبطل عيوونه -_- .. وطبعا من سوووووووووووء حظي اني صرت ورا وحده من هالسيارات .. الهندي ماسك السكان جنه بينحاش منه .. والمدرب الصراحه لاتعليق على قعدته .. متمقط على الاخر ولام الكشن خخخخخخ .. والهندي متصروع ويلزم بهالبريكات جدام المقروده ( حضرتي ) .
بس جد .. شلون يقعدون من النوم عشان تدريب ؟ عفيه مزااج ( بصكهم عين شكلي )
مشالله عليهم ( تحسفت اخاف يصير فيهم شي ) .. الله يعطيهم العافيه p:

افلام الرعب

مادري شنو السر انكم تحبون افلام الرعب
مع ان الاحداث حدها سخيفه .. لازم ظلمه .. مطر .. ناس كانو مجموعه ودايما احد يفترق عنهم عشان المجرم او الوحش او اليني لول يتوحد فيه .. انزين ليييييييييييييييش .. اييه قعدوا مع بعض !!
اختي من فئة اللي غرامهم يتابعون هالافلام .. وعندها مجموعه لا يستهان فيها من افلام .. انا عن نفسي ماحبهم اكرهههههم .. استعسر تحوشني حاله من القااااامت وضيقة الخلق اذا شفت جذي .. واذا رحت مع رفيجتي السينما حق هالنوعيه .. يحوشها نصيب من الدعاوي وانا قاعده يمها هههههههه
شفيها افلام اليهال شحلاتها .. كلها تفاؤل ووناسه ;)

مساكين حتى هالدياي يطالعون افلام رعب :))