الأحد، أغسطس 01، 2010

غربـــة الروح


تطري علي مواقف .. فلاشات ولمحات مو مرتبه زمنيا
وتحضرني كلمات الفيصل لما يقول " في غير الزمان في نفس المكان مرتني الذكرى وانا واقف في نفس المكان .. "
يطري علي لما امي بمرضها وتعبها وملازمة للسرير مافيها حيل
كانوا لما يقعدونها ويحطون ورا ظهرها مخده
كنت المها فجأة بدون مقدمات
تقول لي " شفيج خرعتيني ! "
اقول لها " قاعدة اعطيج قوة .. يمه ما تبين قوة ؟ "
ترد علي " امبله ابي "
والمها حيـــــــــــــــل
وبداخلي شعور اني صج اعطيها قوة خفية .. تصبرها على اللي اهيا فيه
تطري على ضحكتها .. من مرضت حبيبتي وزاد تعبها ما شفتها تضحك
احب اشوف رقم موبايلها بتلفوني وانا بالدوام تصبح علي وتطمن اني وصلت
في بالي حركة ايدها .. مشيتها .. صراخها لما تزفنا ونطفرها .. تحلطمي عليها لما اضيعها في مكان زحمه ..
صورتها في بالي لما القاها الصبح مع ريوقها وابرتها مالت السكر تدور غطاها البرتقالي طايح منها ما تشوفه تحت الصحن ..
سوالفي .. فرحي .. حزني .. سفراتي .. طلعاتي كله معاها
دايما اقول لها انتي رفيقة الدرب
ملازمتها ولاصقه فيها حتى وانا صغيره مو هادتهم بروحهم انام معاهم بالدار
وتطري علي سوالف وسوالف وانا ويــــــن ؟؟ واقفه بينهم في عزاج !
واقفة بينهم وتذبحني غربة الروح .. غريبة بروحي معاهم ..
تذبحني فكرة اني برد البيت و ما القاج
في اذوني يهمسون " عظم الله اجرج " ومره ارد ومرات اسكت ما ارد مو مصدقه
شلون ابصبر على وحشة الدنيا من غيرج
شلون يمر يومي من غير حسج
اطلع واروح وانا ادري اني برد اسولف لج
كل زاويه بالبيت تنطق بوجودج
الحمدالله على كل حال .. ارتاحت عند رب العالمين
هذا حال الدنيا اللهم لا اعتراض
ربي يرحمج ويغفر لج
يالله مثواج الجنة يا يمه
انا لله وانا اليه راجعون